Mizoram-ah hri kai 28 hmuh belh leh an ni

Niminpiah khan Mizoram-ah COVID-19 hri kai mi 28 hmuh leh an ni a, heng zinga mi 3 tihloh chu State pawn atanga rawn lut leh inkhunghranna hmuna awm mek te an ni.

Sawrkar thuchhuah tarlan danin niminpiah khan ZMC Laboratory-ah Sample 662 enfiah leh niin heng atang hian hri kai mi 13 hmuhchhuah leh an ni a, an vai hian Aizawl District-a Sample lak te niin an zinga mi 3 te chu Mizoram-a hri kai hmuhchhuah tawh te nen inkawmhnaih atanga hri kai hmuhchhuah te an ni a, Thuampui mi 2 leh Zuangtui mi pakhat te an ni. Midang 10 te hi State pawn atanga rawn lut niin Assam Rifles mi 7, BSF Sipai pakhat leh Assam atanga rawn haw Assam Regiment pakhat bakah Assam atanga rawn haw Civil mi te an ni.

Niminpiah vek khan District hrang hranga TrueNat Laboratory-ah Sample 108 enfiah niin hri kai mi 2 hmuhchhuah an ni a, hri kai hmuhchhuah pakhat hi Champhai District-a hmuh niin Assam atanga rawn lut a ni a, pakhat dang hi Serchhip District-a hri kai hmuhchhuah, BSF Sipai niin Assam atanga rawn lut a ni bawk.

Rapid Antigen Test (RAgT) hmangin niminpiah khan Sample 745 enfiah ni bawkin hri kai mi 13 hmuhchhuah an ni bawk a, an zinga a tam ber mi 10 te hi Serchhip District-a hmuhchhuah niin BSF Sipai, State pawn atanga rawn lut an ni a, Lunglei atangin mi pahnih leh Aizawl District atangin mi pakhat hmuhchhuah niin BSF Sipai ve ve an ni bawk.

Nimin khan Mizoram-a COVID-19 hri kai enkawl mi 21 te chu enkawl dam an nih hnuah anmahni enkawlna hmun atanga chhuahtir an ni ve leh bawk a, heng te nen hian nimin thlenga Mizoram-ah COVID-19 hri kai hmuhchhuah chu 1986 tling tawhin an zinga mi 1597 te chu enkawl dam an ni tawh a, tunah hian hri kai enkawllai 389 la awm mekin Mizoram-a hri kai zingah zaa 80.41 te chu enkawl dam an ni tawh a ni.

India-ah hri kai zaa 83.32 enkawl dam an ni tawh :

India rama COVID-19 hri kai zinga zaa 83.32 te chu enkawl dam an ni tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah COVID-19 hri kai mi 80,472 hmuh leh niin heng te nen hian hri kai hmuhchhuah hi 62,25,763 an tling ta a, darkar 24 kalta chhungin mi 86,428 te chu enkawl dam niin tun thlenga hri kai enkawl dam chu 51,87,825 an ni tawh bawk a, hri hi hri kai hmuhchhuah atanga chhutin zaa 83.32 niin tunah hian hri kai enkawllai 9,40,441 an la awm mek a ni. India ramah hian hri kai zinga nunna chan 97,497 an awm tawh bawk a, darkar 24 kalta chhung khan nunna chan 1,179 zet an awm leh a ni. India ramah hian Sample enfiah zawng zawng 7,41,96,729 an tling tawh a ni.