Tourism hmasawnna tura pawimawh te thlen

Nimin khan a ni 2-na atan Union Minister of State for Tourism, Prahlad Singh Patel-a hovin State Tourism Minister te Virtual Meeting neih a ni a, he Meeting-ah hian COVID-19 hripui leng vanga Tourism Industry-in nasa taka tlakchhiatna a tawhte sawihoin Tourism Industry siamthat lehna tura hmalak dan tur kawng hrang hrang sawiho a ni.

He Meeting-ah hian Mizoram atangin Tourism Minister, Robert Romawia Royte pawh telin Mizoram Tourism Industry-in COVID hripui a tawrh nasatzia sawiin, Mizoram sawrkar, NGOs te leh Kohhran te thawhhona a tha hle a, tun thleng hian Mizoram chu Corona avanga thi awm lohna State awmchhun niin hripui vei tlemna ber a ni, a ti a. Tourism tuaithar lehna turin Tourism Industry-a eizawngtute hamthatna tur zawnpui dan turte bakah Tourism hmasawnna tura thil pawimawh leh tul hrang hrang te Union Minister hnenah hian a thlen bawk a ni.

Mizoram COVID dinhmun leh boruak thianghlim hian hripui leng a zawh hunah khualzin ten hmun him leh thianghlim a ni tih an lo hriat tur thu leh khualzin tam zawk an lo luh beisei a ni tih pawh sawiin Minister hian, kumin-a Anthurium Festival atana Central Sawrkar atanga sanction hmuh chu COVID Protocol zawm chunga hman tum a nih thu a sawi bawk.

Nimin vek khan Tourism Officers Meeting neiin Virtual Anthurium Festival ropui taka hman an rel a, Central Sawrkarin sum pawh a rawn sanctioned tawh a ni.