Tripura lam chet dan MSU in an dem thu an sawi

Mizo Students’ Union (MSU) chuan Tripura Tuikuk ten Phuldungsei Village Council Area, Thaidawr tlang Mizoram lam chan-a Shiv Mandir sak an tumna hmuna a ruk a rala Minister hova sakhaw thil inthawina an nei mai chu an dem thu leh hriatthiam har an tih thu an sawi.

Hemi chungchanga thuchhuah an siamah MSU General Hqrs. chuan Thaidawr tlangah hian tun thla ni 26 khan Tripura State Forest Minister, Mevar Kumar Jamatia hovin Tripura Secretariat mi pakhat, North Tripura DM leh SP bakah Kanchanpur SDM leh SPDO te nen Tuikuk ho hian Shiv Mandir sak an tumna bulhnai, Mizoram chhungah Sakhaw serh leh sang inthawina hi an rawn nei tih an sawi a. He thil an hriat rual rual hian Mizo Convention Youth Wing (MCYW) Zampui Hills te chu a hmunah kal nghalin, a hmun an thlen hian Minister ho hi an lo tlanchhuah hman chiah thu leh Tripura State Rifle (TSR) te erawh a hmunah hian duty lo indahin tun thleng hian la awmin Mizoram lam erawh hmuh tur an awmlo tih an sawi a. Keimahni ram chhung ngei a Tuikuk misual tlemte ten State Minister ho meuha dan phal lohna hmuna Sakhaw serh leh sang an khawih mai chu kan sakhua leh kan hnam zahlohna lian takah an ngai tih an sawi a ni. MSU chuan kan ram leh mipuite venghim turin rang taka kan sawrkar a chhetchhuah an phut thu leh sawrkar laka beiseina an neih te nimin khan Cbhief Secretary hnenah an thlen thu an sawi bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn