Mizoram-ah COVID-19 hri kai mi 9 hmuh leh an ni

Niminpiah-a Mizoram-a Sample enfiah atangin COVID-19 hri kai mi 9 hmuh belh leh niin an zingah hian hri kaina chhan hriatloh mi pathum an awm.

Niminpiah khan ZMC Laboratory-ah Sample 285 enfiah niin heng atang hian hri kai mi 2 hmuh leh an ni a, heng hri kai te hi Aizawl Ramhlun North leh Tuikual North ami te niin hri kai tawh te nen inkawmhnaih atanga hri kaichhawng te an ni a, taksa a natna hri kai lan-chhuahna neilo ve ve an ni. Niminpiah vek khan District hrang hranga TrueNat Laboratory-ah Sample 148 enfiah niin heng atang hian COVID-19 hri kai mi 3 hmuh an ni bawk a, heng mite hi Mamit, Kolasib leh Hnahthial District-a hri kai hmuhchhuah niin State pawn atanga rawn haw leh taksa-a hri kai lanchhuahna neilo vek an ni bawk.

Niminpiah khan Mizoram-ah Rapid Antigen Test hmangin Sample 1000 enfiah leh a ni bawk a, heng atang hian COVID-19 hri kai mi 4 hmuh thar awmin Aizawl Dawrpui Veng ah hri kai tawh atanga hri kaichhawng mi pakhat awmin Chhinga Veng leh Zotlang atanga hri kai hmuhchhuah mi pathum te erawh hri an kaina chhan hriat a ni lo thung a, Zotlang-a hri kai hmuh te hi nupa niin taksa-a natna hri kai lanchhuahna neih avanga enfiah an ni.

Mizoram-a COVID-19 hri kai enkawl zingah nimin khan mi 6 te chu enkawl dam niin anmahni enkawlna hmun atanga chhuahtir an ni a, heng mite hi Lunglei leh Beraw CCC atangin mi 2 ve ve bakah ZMC leh Thenzawl CCC atangin mi pakhat ve ve an ni a. Heti hian nimin tlai thleng khan Mizoram-ah COVID-19 hri kai hmuhchhuah chu mi 2229 niin mi 2127 enkawl dam an ni tawh a, hri kai enkawllai 102 an awm a ni.

India-ah hri kai zaa 87.56 enkawl dam an ni tawh :

India rama COVID-19 hri kai hmuhchhuah atangin enkawllai chu zaa 10.92 niin hri kai zinga zaa 87.56 te chu enkawl dam an ni tawh thung. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 10,28,622 enfiah leh niin hri kai 63,371 hmuhchhuah thar an awm a, hemi hun chhung hian hri kai enkawl dam 70,338 awm lehin hri kai hmuhchhuah aiin enkawl dam hi an tam zawk a ni.

Heti hian nimin thleng khan India rama Sample enfiah chu 9,22,54,927 niin hri kai hmuhchhuah zawng zawng chu 73,70,468 an ni ta a, hri kai hmuhchhuah zinga mi 64,53,779 te chu enkawl dam niin hei hi hri kai hmuhchhuah atangin zaa 87.56 niin tunah hian hri kai enkawllai 8,04,528 an la awm a, hei hi hri kai hmuhchhuah atangin zaa 10.92 an ni bawk. India rama COVID-19 hri kai zingah darkar 24 kalta chhungin nunna chan 895 awm lehin tun thlenga nunna chan chu 1,12,161 an ni a, hei hi hri kai hmuhchhuah atangin zaa 1.52 a ni bawk.

Comments

Chhiar Hlawhte