Rashtriya Poshan Maah 2020 kharna neih a ni

September thla chhunga hman, Rashtriya Poshan Maah (National Nutrition Month) 2020 chu nimin khan kharna neiin Social Welfare Minister, Dr. K. Beichhua chuan a hmanpui a ni.

Social Welfare Department hnuaia Women & Child Development Department buatsaih Rashtriya Poshan Maah-2020 kharna hunah hian Social Welfare Minister chuan March, 2018-a he Programme kalpui atangin tun ngaihtuahin Mizoram-in hma a sawn hle nia a hriat thu sawiin, heng hmalakna leh hlawhtlinna lo lang te chu faktlak nia a hriat thu a sawi a. Kum 2015-16 a NFHS IV a Stunting (naupang than thu) za zelah 28 ni thin chu ICDS Report March 2020-ah chuan za zelah 7.53-ah a tlahniam a; NFHS IV-a Underweight (an kum bi aia zang naupang) za zelah 11.9 ni thin chu ICDS Report March 2020-ah chuan za zelah 1.7-ah a tlahniam a; NFHS IV-a Wasting (an kum mil a naupang thang thalo) za zelah 6.1 ni thin chu ICDS Report March 2020-h chuan za zelah 0.5 ah a tlahniam tih a tarlang a. Kum 2019-a Mizoram Infant Mortality Rate 15 chu kum 2020-ah chuan 5-ah a tlakhniam thu pawh a sawi lang bawk.

 

Rashtriya Poshan Maah (National Nutrition Month) hi kum 2018-ah hman tan niin Sawrkar Laipui Flagship Programme pakhat a ni a. A thil tum ber chu naupang te, nu naupai mek te leh hnute hne lai fa nei mek ten eitur tha an hmuh theihna hma lak leh a tul anga anmahni te eitur tha pek a ni.