Mizoram-a Employment Exchange-a inziaklut zingah hmeichhia aiin mipa an tam zawk

Kum 2018-2019 chhung khan Mizoram-ah sawrkar hna hmu lo leh hna zawng mek, Employment Exchange-a inziaklut mi 32,332 awmin hna zawng inziaklut zingah mipa chu a tam zawk an ni.

Directorate of Economics & Statistics Department-in tunhnaia a tihchhuah ‘Statistical Abstract of Mizoram 2019’-a tarlan a nih danin kum 2018-2019 chhunga Employment Exchange-a inziaklut zinga 17,767 te chu mipa niin midang 14,565 te chu hmeichhia an ni a, hna zawng inziaklut zingah thiam BA (Graduate) chu a tam ber niin thiamna bik nei pawh thahnem tak an awm bawk a ni. Employment Exchange-a inziaklut zingah hian thiam bik neilo (Unskilled) mi 119 awmin pawl 6 leh pawl 9 inkar mi 2,652 an awm a, pawl 10 (HSLC) pass mi 3,631 awmin pawl 12 (HSSLC/PUC) pass mi 6,036 an awm bawk.

Hna zawng inziaklut zingah hian Graduate mi 15,056 zet an awm a, an zinga a tam ber chu BA (General) niin mi 12,826 zet an awm a, B.Sc (General) 1479 awmin B.Com 351 an awm a, BA (Computer Science) 106 zet an awm bawk a, heng bakah hian Subject hrang hrang a Graduate an awm bawk. Heng bakah hian Post-Graduate mi 1,865 zet inziaklut an awm bawk a, Arts-ah mi 978, Science-ah 309, MSW-ah 130, Commerce-ah 63, Computer Science-ah mi 47 leh Engineering-ah mi 12 niin Subject dang-ah mi 326 an awm bawk a. Technical Trade hrang hranga thiamna nei hna zawnglai inziaklut mi 1,366 leh pianphunga rualbanlo (Physically Handicapped) hna zawng inziaklut mi 1607 an awm bawk a ni.

Hetihlai hian Mizoram Building & Other Construction Worker Welfare Board hnuaia inziaklut pawh an pung chho zel a, kum 2012-a mi 8,967 an inziahluh hnuah kum 2018 khan inziaklut tam ber kum niin mi 19,368 zet inziaklut thar an awm a. Contractors/Company/Department/Employers adt. ten Labour Cess atana zaa pakhat (1%) an chhunluh pawh pung zelin kum 2018-ah khan cheng nuai 2,054.78 zet chhunluh a ni a, heng atang hian kum 2018-2019 ah khan Board Member te hnenah cheng nuai 576.38 semchhuah a ni bawk.

Comments

Chhiar Hlawhte