Chanchin thar thenkhat :

Deputy Speaker in tlawh

Assembly Deputy Speaker leh Tuikum bialtu MLA, Er. Lalrinawma chuan nimin khan a bial chhunga Darlawng khua tlawhin NH. 54 laihzauh tur chungchanga harsatna awm te a sawipui. Nimin-a Darlawng tlawhtu Assembly Deputy Speaker, Er. Lalrinawma hian NH. 54 chu kan hnam Ro tur a ni tih sawiin, hei vang hian hna-thawktute tan pawh harsatna siam lova thahnem ngai taka thawhpui a tul thu a sawi a. NH-54 kawng laih tur Compensation leh an khawchhung kawng laidan tur chungchanga an buaina te enfiahin, tun atanga hun reilote ah pek (marking) kheng turin Bialtu MLA leh Dy. Speaker nibawk chuan a thawktu te a hrilh nghal bawk a ni. He hunah hian bialtu MLA hi Darlawng VCP leh a thawh-puite bakah YMA leh Tuikum MNF Block hruaitu ten an tawiawm a, NH. 54 laihzauh hna thawktu turte pawh a kawm bawk a ni.


Correcting Fluid leh Thinner khuahkhirhna siam

Mizoram sawrkar chuan Ministry of Health & Family Welfare, Govt. of India thuchhuah zulzui leh Section 188 of Indian Penal Code bakah Section 77 of Juvenile Section (Care and Protection of Children) Act, 2015 tlawhchhanin tunlaia Naupang thenkhat ten ruih nana an hman thin, Correcting Fluid leh Thinner (Pentui tihrehna) te chu thu leh awm hma chu a bottle anga siam-chhuah leh zawrhchhuah a khap a. Heng Correction Fluid leh Thinner te hi a bottle a khunga siam leh zawrhchhuah ni lovin tlem a zawng chauh hmehchhuah theih ang chia zawrh erawh phal a ni a. Nawhrehna atan Zirlai ten an hmang duh a nih pawhin an nu leh pa te dawr-ah kalpuiin an lei theih chauh dawn a ni.


COVID-19 dona atan hlan

Mizoram chhunga HDFC Bank hrang hrang (Branch 8) te chuan an sum thawhkhawm atanga Rs. 13,75,000/- chu COVID-19 dona tura thawhin Health Minister, Dr. R. Lalthangliana hnenah nimin khan an hlan.


Congress Thalai ten thilpek an hlan

Congress Thalai,Mizoram Pradesh Youth Congress Committee (MPYCC) chuan nimin khan an President, Dr. Lalmalsawma Nghaka hovin Mizoram leh Assam inrina, National Highway 54-a duty IR te tlawhin tanpuina pawisa Rs. 5000/- leh Joint YMA Vairengte hnenah Rs. 10,000/- an hlan a, tunhnaia buaina thleng avanga hliam tuar te pawh tlawhin pawisafai in an kan bawk a ni.


Luidung humhalh sawiho

Fisheries Minister, K. Lalrinliana hovin nimin khan Department hotute leh Central YMA hruai-tute chuan luidung leh nungcha humhalh kawnga thawhho dan tur sawihona an nei a, he hunah hian 'The Mizoram Fisheries Rules 2019' chungchang sawifiah a nih bakah 'The Mizoram Fisheries Conservation Rewards Scheme, 2019' sem dan turte pawh sawiho a ni a. Central YMA hruaitute pawhin luidung leh luidunga nungchate humhalhna kawngah sawrkar nen an thawkdun thei tur chu lawmawm an tih thu leh leh luidung humhalh chu YMA in hun rei tak atanga a lokal pui tawh thu an sawi bawk.


Minister 3 in Vairengte tlawh

School Education Minister, Lalchhan-dama Ralte, Excise Minister Dr. K. Beichhua leh Tourism Minister, Robert Romawia Royte te chuan nizan hmasa khan Vairengte tlawhin ramri-a harsatna awm te a hmunah an enfiah a, Vairengte khawtlang hruaitute leh Central YMA hruaitute bakah MZP leh MSU General Hqrs. hruaitute chu Vairengte-ah hian an kawm bawk a ni. School Education Minister chuan Vairengte khawtlang, YMA, MZP, MSU leh Police Force zawng zawngte chungah Sawrkar aiawha lawmthu sawiin, sawrkar in hma a lakna te a sawilang bawk a ni.


Anthurium Festival hman tum

Tourism Minister, Robert Romawia Royte hova Zirtawpni kaltaa Tourism Department-a hotu lian te thukhawm chuan kumin-a Anthurium Festival hman dan tur relin TV leh internet kal-tlangin Anthurium Festival hi hman tum a ni a. Tourism Minister chuan kumin 2020 hi natna hrileng, COVID-19 in min tibuaiin, khualzin hipna kawnga hmalak leh mipui kokhawm zawnga hlim hlawp buatsaih chu a remchang lova, chu-vangin he Festival hi TV leh Internet kaltlanga State chhung leh pawna mipui a tam thei ang berin an chhim theih tura hman tum a ni, a ti a. Kumin COVID-19 hrileng avanga hman loh ngawt ai chuan sawrkar dan bawhchhe si lova Virtual-a he Festival hi October, 2020 thla tawp lama hman tura rel a nih thu a sawi bawk.


Ramri-a Duty te tlawh

Manpower Development Board Vice Chairman leh Aizawl West-I Bialtu MLA ni bawk, Zothantluanga chuan nimin khan Mizoram leh Assam ramri, Kanhmun khaw bul Medeli-a 5th IR Sipai duty te chu tlawhin, an mamawh thil chi hrang hrang a pek bakah, Mizoram himna tur atana Duty mek Sipai te chu Mizoram leh Mizo hnam tana an hnathawhah lawmthu hrilhin, zam lo leh huaisen taka an hmabak hlen zel turin a fuih a. Ramri bula khaw hrang hrang mipuite pawh thlamuanin, an harsatna chu Sawrkar-in a hriatpui thu leh lungmuang taka an khawsak zel theihna turin Mizoram Sawrkar chuan hma a lak zel dawn thu a hrilh bawk. Hemi hma Inrinni khan Thinghlun khaw thlang-a 4th IR Sipai duty te pawh a lo tlawh tawh bawk a ni.


Mi 3 enkawl dam leh an ni

Pathianni-a Mizoram-a Sample enfiah te zingah COVID-19 hri kai hmuh thar an awmloh laiin nimin khan hri kai mi 3 te chu enkawl dam an ni thung a, heti hian Mizoram-a COVID-19 hri kai hmuhchhuah 2253 zingah mi 2151 te chu enkawl dam niin 95.47% enkawl dam an ni tawh a, hri kai enkawllai 102 an awm bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn