Mizoram-ah COVID-19 hri kai an pun zel avangin School kal chhunzawm rihlo tura rel a ni

School Education Minister, Lalchhandama Ralte hova nimin-a sawrkar mi pawimawh thukhawm chuan tunhnai ah Mizoram-a COVID-19 hri kai an pun avang leh zirlaite zingah hri kai an awm zel avangin 'No Tolerance Fortnight' hman hun, chawlhkar hnih chhungin School chawlh leh rih phawt nise an ti.

Nimin khan School Education Minister, Lalchhandama Ralte hovin SAD Conference Hall-ah School Education Department hotute leh Zirtirtu pawl hrang hrang aiawhte thukhawmin COVID-19 hrileng mekin zirlaite a kan kai dante thlir chungin hri inkaidarh a nasat zel loh nan Mizoram sawrkar ruahmanna atanga 'No Tolerance Fortnight' hman chhung, October 26 atanga chawlhkar hnih chhung chu School khar leh nise an ti a, November 9, 2020-ah harsatna dang a awm leh a nih loh chuan School luh leh nise tih rel a ni.

He Chawlhkar hnih, School kal loh chhung hian Class X leh XII zirlaite tan hian Online Class kalpui zel tura ruahman niin, MBSE lamin Board Exam atana Form Fillup an kalpui mek nen a intihbuai loh nan ruahmanna siam nise an ti a. October 12,2020 khan Minister ho a Meeting-ah Class X leh XII te tan October ni 16, 2020 atangin school tan nise tih rel a lo ni tawh a ni.

He thutkhawm ah hian School Education Minister chuan naupangte himna chu sawrkarin a ngaih pawimawh ber a nih thu leh nu leh pa te hlauhthawnna te, hriselna lama hotute hlauhthawnna te pawh an hriatthiam thu a sawi a, Hostel neitute tan pawh fimkhur a tul thu sawiin, inkaihhruaina an zawm that leh that loh te pawh enzui a nih dawn thu a sawi a; Hostel-ah tuna awm laite bak mithar lak a rem loh thu a sawi bawk.

He thutkhawm-ah hian School lama thawk te chuan zirlai nu leh pa thenkhat te zingah an fate School-a kaltir ngam lo an awm thu te, School Compound chhungah SOP kenkawh a har thu leh harsatna a awm thu te an sawi a. Class an kal chhung reilote ah naupangten zir chakna an neih len tawh dan te sawi a ni bawk.

Nimin-a thukhawm ah hian School Education Department-a Commissioner & Secretary, Esther Lalruatkimi, School Education Director, James Lalrinchhana leh Education Department leh SCERT-a hotute bakah Higher Secondary School Principal Council hruaitute, HISSLAM, MISSTA leh MISA hruaitute an tel bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn