BSF Sipai hri kai enkawl dam vek an ni ta

Serchhip Nursing School CCC-a BSF Sipai hri kai enkawl zawng zawng chu enkawl dam niin hri kai enkawl dam hnuhnung ber chu nimin khan a enkawlna hmun atang hian chhuahtir a ni.

Serchhip CMO Office atanga thu kan dawn danin Serchhip-a Nursing School CCC-a BSF Sipai hri kai enkawllai mi pakhat chu hri laka a fihlim hnuah nimin khan Nursing School CCC atang hian chhuahtir a ni a, he hri kai enkawl dam hi Serchhip District-a hri kai hmuhchhuah niin Sept. 10, 2020 khan Serchhip District-ah a rawn thleng a, Sept. 15-ah Rapid Antigen Test hmangin hri a kai lo tih hriat niin Sept. 24-ah TrueNat Laboratory atangin hri a kai lo tih hriat leh a ni a, amaherawh chu inkhunghranna hmuna a awmpui te zingah hri kai an awm zel avanga enfiah leh a nih hnu Sept. 29 khan Rapid Antigen Test hmangin hri a kai tih hmuhchhuah a ni a, hemi hnu hian Nursing School CCC-ah hian dahluh niin nimin khan enkawl dam a ni ta a ni.

Heti hian BSF Sipai hri kai Serchhip District-a enkawl te chu enkawl dam vek an ni ta a, Mizoram sawrkar in Nursing School CCC hi BSF Sipai zinga hri kai te enkawlna hmun atana ruahmanin August 16, 2020 khan hri kai enkawl tur hi dahluh tan an ni a, nimin thleng khan hri kai mi 189 dahluh ni tawhin an vaiin enkawl dam vek an ni ta a ni.

Darkar 24 kalta chhungin Serchhip District-ah hri kai hmuhchhuah thar an awm lova, tun dinhmunah Serchhip District-a hri kai hmuh-chhuah chu mi 65 ni tawhin mi 61 enkawl dam an ni tawh a, hri kai enkawllai mi 4 awmin Chhiah-tlang Tourist Lodge CCC-ah mi 3 leh Thenzawl AYUSH Hospital CCC-ah mi pakhat enkawl mek an ni.

Serchhip District-ah hian hri leng vanga mahni In lama inkhunghrang mi 29 an la awm mek a, sawrkar hmunhmaa inkhunghrang pawh mi 88 an la awm mek bawk a ni.