Serchhip-ah World Sight Day

World Sight Day vawi 21-na chu nimin khan khawvel pumah hman niin Serchhip-ah pawh ‘Hope in Sight’ tih thupui hmangin he Ni hi hman a ni.

Serchhip District Hospital OPD Building leh Eye OPD Building-a World Sight Day puala inkhawm tawi National Programme for Control of Blindness & Visual Impairment (NPCB&VI) bultuma neih hi Serchhip District Medical Superintendent leh Eye Surgeon, Dr. ZD. Lalmuanawma chuan hmanpuiin kan taksa tana Mit pawimawhna leh enkawl that a pawi-mawhna te a sawi bawk.

He hunah hian Serchhip District Hospital-a Opthalmic Assistant, Zosangpuii chuan he Ni puala thuchah chhiarchhuakin Mit tana tha thlai hring te, Thei eng leh sen lam te ei tel fo tur a nih thu te, Mit naute paw (Cataract), Mit hrui no (Optic Nerve damage) leh Mit Parda Vung leh ser te chu meizuk vanga awm thei a nih avangin meizuk loh a pawimawh thu te, Ni zung laka Mit a him theih nan Sunglass vuah thin tur a nih thu te, Mit tana himlo hna thawh laiin Protective Googles/Safety Glasses (Mit tana him tarmit) vuah thin tur a nih thu te leh Computer, Mobile Phone leh TV te en ngut ngut loh tur a nih thu leh heng te hi minute 20 chhung en a nih chuan second 20 chhung tal ft. 20 a hla en thin tur a nih thu te a tarlang a. A khat tawka Mit check-up thin tur a nih thu leh mahni-a damdawi in chawh ve ngawt loh tur a nih thu bakah exercise lak that chu Mit hriselna atan a pawimawh thu te a tarlang bawk.

NPCB&VI hmalakna hian kumtin Aug. 25 atanga Sept. 8 chhungin ‘Eye Donation Fortnight’ chu hman thin niin he hunah hian midangte tana thih hnua Mit pe tura inzirtirna neih thin niin kumin ah erawh chuan hri leng avanga duh anga hmalak theih a nih loh thu thawktute chuan an sawi a. Serchhip District-ah hian nikum leh kumin chhungin midangte tana thih hnua Mit pe mi pahnih an awm tawh thu pawh an sawi bawk.

Comments

Chhiar Hlawhte