DC hovin District Level Consultation Meeting nei

Mizoram Science, Technology & Innovation Council (MISTIC) bultumin nimin khan Serchhip District Level Consultation Meeting chu Serchhip DC Meeting Hall-ah neih a ni a, he thutkhawm hi District Bawrhsap, Kumar Abhishek chuan a kaihruai a ni.

Nimin-a Serchhip District Level Consultation Meeting-ah hian District Bawrhsap, Kumar Abhishek chuan MISTIC atanga hetiang hmalakna a awm chu lawm-awm a tih thu a sawi a, kan District hmasawnna tur thil tha tak a puakchhuah ngei a beisei thu a sawi bawk.

He thutkhawm ah hian MISTIC-a Scientific Officer, Joel Lalbiakkima chuan Science & Technology hmanga hmasawnna kawng awm chhoh zel theih dan dapchhuah leh District tina kal kuala Department hrang hrangten Science & Technology lama hma an sawn theihna tur thil a hmuna zirchian sak te, an harsatna sutkian puite chu an thiltum a nih thu a sawiin, Consultation buatsaih a nih chhan leh an bawhzui tum dante a sawifiah hmasa a. Hemi hnu hian Department hrang hrang aiawhten harsatna an tawh leh a sutkian theih dan tur nia an hriatte an sawiho zui a ni. Nimin-a thutkhawm ah hian Addl. DC, Lalmuansanga Ralte leh DC Office-a Officer te bakah Serchhip District-a Office pawimawh te an tel a ni.