Mizoram-ah COVID-19 hri kai mi 8 hmuh belh an ni

Niminpiah-a Mizoram-a Sample enfiah atangin COVID-19 hri kai mi 8 hmuh belh leh an ni a, an vai hian State pawn atanga Mizoram-a rawn lut vek an ni.

Niminpiah khan ZMC Laboratory-ah Sample 364 enfiah niin heng atang hian COVID-19 hri kai mi 4 hmuh leh an ni a, heng hri kai hmuhchhuah te hi Assam Rifles mi 3 leh BSF Sipai mi pakhat te niin tunhnaia Mizoram pawn atanga lo lut, sipai inkhunghranna hmuna inkhunghrang mek te niin taksa-a natna lanchhuahna neilo te an ni.

Niminpiah vek khan District hrang hranga TrueNat Laboratory-ah Sample 89 enfiah niin heng atang hian hri kai mi 4 bawk hmuh an ni a, an zinga mi pathum te chu Kolasib District-a hri kai hmuh te niin Assam atanga lo haw mi 2 leh Sikkim atanga rawn haw mi pakhat niin an vai hian inkhunghranna hmuna awm mek te an ni. Serchhip District atangin hri kai pakhat hmuh ni bawkin Thenzawl-a Tribeni Construction Limited hnuaia hnathawk, Assam atanga rawn lut leh inkhunghranna hmuna awmlai niin taksa-a hri kai lanchhuahna neilo a ni bawk. Nimin khan District hrang hrangah Rapid Antigen Test hmangin Sample 420 enfiah niin hri kai hmuhchhuah erawh an awmlo thung a ni.

Nimin khan Mizoram hmun hrang hrang atangin COVID-19 hri kai mi 50 te chu anmahni enkawlna hmun atanga chhuahtir an ni ve leh thung a, heti hian nimin thleng khan Mizoram-a COVID-19 hri kai hmuhchhuah chu 2128 ni tawhin mi 1887 enkawl dam an ni tawh a, hri kai enkawlai 241 awmin zaa 88.67 enkawl dam an ni tawh a ni.

India-ah hri kai thar aiin enkawl dam an tam zawk :

India ramah darkar 24 kalta chhungin COVID-19 hri kai hmuh-chhuah thar 61,267 an awm laiin hri kai enkawl dam 75,787 an awm a, hri kai thar aiin enkawl dam hi 14,520 zetin an tam zawk a ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 10,89,403 enfiah leh niin heng atang hian hri kai 61,267 hmuh an ni a, heng te nen hian India ramah Sample 8,10,71,797 enfiah niin hri kai hmuhchhuah zawng zawng pawh 66,85,082 an tling tawh a ni.

India ramah hian COVID-19 hri kai enkawl dam pung ve zelin darkar 24 kalta chhung khan mi 75,787 enkawl dam an ni a, heng te nen hian tun thlengin hri kai 56,62,490 enkawl dam niin hri kai hmuhchhuah atanga zaa 84.70 te chu enkawl dam an ni tawh a, tunah hian hri kai enkawllai 9,19,023 an awm mek bawk a ni. Darkar 24 kalta chhung khan India ramah hri kai nunna chan 884 an awm ve leh bawk a, heng te nen hian tun thlengin hri kai zingah nunna chan 1,03,569 an awm tawh bawk a ni.

Comments

Chhiar Hlawhte