Vawiin atangin Mizoram pumah COVID-19 No Tolerance Fortnight hmang dawn

Vawiin atang hian Mizoram pumah ‘COVID-19 No Tolerance Fortnight’ hman a ni dawn a, hei hi COVID- 19 avanga khuahkhirhna siam te mipuiin nunphung thlak danglam khawpa an hman theih nana ruahman niin COVID-19 dona kawnga Dan siam hrang hrangte chu khauh taka kenkawh a ni dawn a ni.

Chawlhkar hnih chhung awh tur ‘COVID-19 No Tolerance Fortnight’ hman tur chungchanga Mizoram sawrkar in thuchhuah a siamah chuan Fortnight neih chhung hian COVID-19 chungchanga himna lam inzirtirna, Jan Andolan Campaign chu mipui-ah a tam thei ang ber kalpui tur a ni a. Sawrkarin dan a siam, The Mizoram (Containment and Prevention of the Spread of COVID- 19) Act, 2020 in mipui te zawm tura a tih te leh Sawrkar thupek dangte khauh taka kenkawh tur a ni ang.

He ruahmanna kalpui a nih dawn avang hian Sept. 30, 2020-a Unlock 4.0 kaihhruaina siam leh hman mek thenkhat chu siam danglam a ni a, heng zingah hian Head of Department/Head of Office ten thawktu zaa 70 chu a inchhawkin Office an kal tir anga, a bak zaa 30, kum lama la naupang deuh leh hrisel zawk te chu ‘COVID-19 No Tolerance Fortnight’ chhunga DDMA te tha tichak turin mahni District-a Deputy Commisioner theuhvah ‘COVID-19 Executive Duty’ atana hman turin an hming list leh nihna kimchang an thehlut anga, anni hian anmahni Office-a kal lovin ‘COVID-19 Executive Duty’ hna hemi hunchhung hian an thawk anga. Head of Department/Head of Office ten COVID- 19 laka inzirtirna - Mask vuah, inkarhlat taka awm (social distancing), kut silfai leh tih thianghlim ngun, chungchang tarlanna Poster leh Banner tam thei ang ber tarin an Office hmunhma ah mipui vantlang inzirtina atan an kalpui ang.

Hei bakah hian School, College leh Educational/Coaching Institute te chuan online hmang chauhin zirtirna an kalpui tur a ni a. Zirtirtute rawn tura School kal pawh khap a ni a. He Hapta hnulama zirna In hawn chungchang chu State Disaster Management Authority, Mizoram in School Education Department leh Health & Family Welfare Department thurawn a zirin a ngaihtuah chauh ang.

Games & Sports Tournament huaihawt khap a ni a, Games & Sports practice-na hmun - Indoor-ah mi 10 leh Outdoor-ah mi 25 aia tam awmkhawm phal a ni lova. Hmun hawn phal loh zingah Picnic Spot dah belh niin Mitthi vuina leh inneihna (man hlan/inneih inkhawm leh reception) ah te chuan mi 35 (sawmthum panga) chin punkhawm phal a ni anga. Lungphun, anniversary, pawl thila kalkhawmna, book release adt. ah te chuan mi 20 (sawmhnih) aia tam punkhawm khap a ni a. Heng hmuna tel te chhinchhiahna kimchang (hming, address, phone number leh kal hun te) ziahna bu register chu a huaihawttu ten an vawng tur a ni bawk anga. Hei bakah hian Gym hawn phal a ni tawh dawn lo bawk a ni.

State Disaster Management Authority a State Executive Committee Chairman in thu-chhuah a siamah chuan COVID-19 kai hmuh-chhuah thar zingah kai chhan leh kaina tur awm hriatchian loh an pun tak zel avangin ‘Community Spread (khawtlanga hri darh)’ hi a awm tan tawha ngaih a ni, a ti a. He ‘Community Spread’ hi dan chah a nih theih nan ni 15 chhung ‘CO-VID-19 No Tolerance Fortnight’ hi hman tur a ni a, hemi hun chhung hian sawrkarin dan a siam, ‘The Mizoram (Containment & Prevention of the Spread of COVID-19) Act, 2020’-in mipuite zawm tura a tih te leh sawrkar thupek dangte khauh taka kenkawh tur a ni, a ti bawk.

He ruahmanna leh hmalakna hi Mizo-ram pumah khauh taka kenkawh a ni dawn a, Serchhip District-ah pawh hemi atan hian rua-hmanna hrang hrang siam a ni bawk.