Chanchin thar thenkhat :

MBCC in Dan hman rihloh duh

Mizoram Business Coordination Committee (MBCC) Executive Meeting tunkar Thawhtanni a neih chuan Mizoram sawrkar in The Mizoram Shops and Establishment Acts 2010 leh Amendment Bill 2020 a ruahman zirchiang tura an ruat, Study Group te zirchianna ngaithlain MIMA in ‘Dan Sakei’ an lo tih tawh sawrkar in a tuaihnum leh hman theih tura a chhawpchhuah thar chu a hma aiin a hlauhawm zawkah an ngai tih an sawi a. He Dan hi sawrkar in sumdawngtute a hman luihtir dawn a nih chuan sumdawngte mai bakah mipuiin an tuar dawn nia sawiin, kan ramah chuan la hman rihloh tha an tih thu an sawi a. He Dan hi hman a nih loh theihna turin a theih tawkin hma an la dawn tih an sawi bawk. MBCC-ah hian sumdawng pawl 47 an tel niin an sawi bawk.


Smart Classroom Project

Mamit District chhunga Middle School thlan-chhuah 20 te hnenah nimin khan Smart Classroom (K-Yan) semchhuahna leh training chu Mamit District Bawrhsap, Dr. Lalrozama IAS hovin neih a ni a, Bawrhsap chuan Mamit District Middle School-te tana Smart Class kalpuina tur hmuh a ni ta chu lawmawm a tih thu sawiin, zirtirtute pawh hemi atana intuaihriam zel turin a chah bawk. Mamit-a Smart Classroom (K-YAN) Project hi REC Ltd. (Rural Electrification Corporation Limited) CSR Education Project kal zelah Education Project hnuaia zirna in hma a sawn zel theihna tura duan a ni a, zirna In 20 thlan niin heng zirna In te tana khawl 20 lei nan cheng nuai 49 ruahman a ni a, K-YAN khawl hi Audio-Visual Learning-aid niin, CBSE Learning Module a chhawm tel a ni.


VC tan training buatsaih mek

State Institute of Rural Development & Pan-chayati Raj (SIRD&PR), Mizoram chuan VC thlan tharte tan nimin atang khan Hnahthial, Ai-bawk, Darlawn, Kolasib leh Reiek-ah te training buatsaihin Champhai, Khawzawl, Serchhip, Tlabung leh Lungsen-ah karleh-ah neih leh a ni ang.


Article ziak lawmman sem

Central YMA buatsaiha Veng leh khaw hrang hranga YMA Chanchinbu Editor te puala ‘Zirna uar’ tih hmanga Article inziahsiak result puanna leh lawmman semna chu nimin khan Aizawl-a Central YMA Hall-ah neih a ni a, he Article inziahsiakna ah hian R. Lalchhanchhuaha, Tlangnuam West Branch Aizawl chu pakhatna niin Remmuana Chawngthu, Theiriat Branch Lunglei leh Lalruatfela Hmar, Bethlehem Vengthlang Branch chu pahnihna niin H. Lalsangzuala, Rahsi Veng Branch, Lunglei chu pathumna a ni bawk.


MPCC in sawrkar an phut

Mizoram Pradesh Congress Committee (MPCC) chuan tunhnaia Education Department in CSS hnuaia Hindi Teacher mi 665 tana hna lak tura Advertisement a chhuah chu lawmawm an tih thu sawiin, kum tam tak lo thawk tawh CSS Hindi Teacher 1,305 te chu MNF hotuten kum 2018 MLA Election dawna an campaign auhla-a an intiam ang ngeiin, mi 665 chauh la lovin an zavaia la leh vek tur leh CSS Hindi Teacher te chu Vote zawn nan chauh hmang lo tura MNF leh sawrkar an phut thu an sawi bawk.


Ruahmanna siam sak phut

Mizoram CSS Hindi Teachers’ Association (MCHTA) chuan CSS hnuaia an thawh laiin trained phalsak an ni lo nia sawiin, CSS hnuaiah Hindi Teacher mi 665 lakna turah an dil ve theih nan ruahmanna siam an duh thu an sawi. Niminn-a thuchhuah an siamah MCHTA chuan Feb. 11, 2011-ah CSS hnuaia mi 1305 ten Hindi Teacher hna an thawh tan thu leh Feb. 29, 2017-ah bantir an ni tih sawiin, ban an nih atang hian an thawh leh theihna tur atan theihtawpa hma la in heng an hmalakna leh sawrkar hmalakna zarah tunah hian CSS hnuaiah Hindi Teacher mi 665 lakna tur alo chhuah thu leh Advertisement pawh tihchhuah a nih tawh thu an tarlang bawk. He Hindi Teacher lakna turah hian CSS Hindi Teacher, kum 6 chhung lo thawk tawh te chu ngaih pawimawh leh, CSS Hindi Teacher mi 1305 te atang ngeia he hna hi hnawhkhat tura sawrkar an phut thu pawh an sawi bawk.

Comments

Chhiar Hlawhte