Ramri chinfel thuai a tul thu MZP in CM-ah thlen

Zonuna Kawlni /

Mizo Zirlai Pawl (MZP) chuan Mizoram leh Assam ramri chu chinfel thuai tul an tih thu Chief Minister hnenah an thlen.

MZP hruaitute hian Inrinni khan Mizoram Chief Minister, Zoramthanga chu a Pisa-ah kawmin Mizoram leh Assam ramri chungchang te, Thinghlun ram-a IR Post dah ngheh chungchang te, New Kawnpui khuaa IR Post-ah sipai dah belh chungchang te leh DIG Western Range siam chungchangte an sawipui a. MZP chuan tunhnaia Assam miten nasa takin hmun hrang hrangah Mizoram an rawn nek nia sawiin, hriatthiam har an tih thu an sawi a. Mizoram leh Assam boundary chinfel thuai a tul thu thlenin, thil duhawm lo thlenna hmun Thinghlun rama duty Police-te inpekna chu lawmawm an tih thu an sawi bawk a. Chutih rual chuan Vaihmite leh Thosi kara rammu te awmna hmun hi thuamthat a ngaih thu leh dahngheh an nih theih nana hmalak a tul thu Chief Minister hnenah hian an thlen a. Chief Minister chuan a tul anga bawhzui a nih tur thu a lo sawi a ni.

Tripura Zampui tlangdunga Mizoten an thlamuanpui em em New Kawnpui khuaa IR Post awm chu thawktu an indaih tawkloh avangin sipai dah belh a tul thu pawh MZP hruaitute chuan Chief Minister hnenah an thlen a. Chief Minister chuan enzui a tum thu a lo hrilh a ni.

Hei bakah hian Mamit District chu Assam leh Tripura Border nei, ramri buai pawh a awm rengna a ni tih pawh MZP hruaitute chuan sawiin, harsatna pawh a thleng ve fo thin tih an sawi a. Venghimtu Police Establishment tihlena tihchangtlun a tul thu sawiin, Mamit District chhungah Armed Force Battallion hrang hrang te an in awmpawlh nuai a, Command tu fel tak pakhat hnuaia an awm loh chuan Law & Order kenkawh kawngah te, Discipline chungchangah te a buaithlak hle thin a. Dan leh thupek kenkawh chungchang leh a bik takin ramri humhalh chungchangah hmun leh hmuna enkawltu DIG Range, anmahni hokhawmtu awm loh vang hian harsatna pawh a thlen thin avangin DIG Western Range hmanhmawh taka siam turin Chief Minister an ngen a. Chief Minister chuan MZP ngenna angin hmalak a tum thu a sawi bawk.

Comments

Post a Comment

Popular News (Last 30 Days)

C&I Minister in hmanpui

Zonuna Kawlni /
Commerce & Industries Minister F. Roding-liana chuan nimin khan Industrial Growth Centre, Luangmual-ah ZOPA Concrete Block Industry hawnna hun hmanpuiin Industry la din zel turte pawh sawrkar chuan puih a huam reng tih a sawi a. Mizote’n kan ramchhunga siam, kan mamawh em em, Mizo siam dik tak Cubic lung kan ban phaka a awm tawh tur chu a ropui hle tih sawiin, hlawhtling tur chuan taimakna leh tih tak takna rilru neih a tul thu a sawi bawk.
Kimchang zawkin »