MUP ten hnatlang nei

Nimin Oct. 1, 2020 kha khawvel puma Upa te ni, International Day of Older Persons niin Serchhip-a MUP Unit thenkhat chuan Vantlang tana thil tha tihna hun atan an hmang a ni.

International Day of Older Persons pual hian MUP Serchhip Chhim Veng Unit te chuan an huam-chhunga kawngpui dung te ti faiin mi 20 vel an thawkchhuak a, chawhnu lamah an Vice President, F. Lianhlira te In-ah hunserh hmangin ruai an kilho nghal bawk.

MUP Kawn Veng Unit te pawhin an huamchhung thenfai hnatlang neiin mi 40 vel an thawkchhuak a, Serchhip Bazar leh a chhehvel thenfai hna thawkin thingpui ruai an kilho bawk a ni. Serchhip AOC Veng Unit pawhin an huam-chhunga kawngpui dung thenfai hnatlang neiin hun an hmang bawk a, member 30 vel thawk-chhuakin tlai lamah an Vice President, Dengsailova te In-ah hunserh hmangin ruai an kilho bawk a. Heng faina hnatlang neihna ah te hian UD&PA Department chuan bawlhhlawh paihna tur Motor an chhawp sak bawk a ni.