Mizoram politics-ah insiamthatna (reformation) a thleng mek - Lalduhoma

Serchhip bialtu MLA, Lalduhoma chuan Mizoram politics-ah insiamthatna (reformation) a thleng mek niin a sawi.

Inrinni-a Sumsuih a ZPM VC thar lawmna leh mithar lawmluhna hunah Lalduhoma MLA chuan he thu hi sawiin, VC member tharte leh ZPM zawm tharte chu a chhe lai siamthatu ni turin a ngen a. MLA atanga amah bân tir tumna chungchang sawiin, “Mi tam takin lungawilohna lantir a, buaina a chhuah hlau te an lo awm a. Hei hi kalphung thar zia a ni lova, politics a Pathian ram thlentir tum kan nih avangin Pathian hnenah tawngtai rualin hun kan hmang ta zawk a ni. ZPM thalai rual te leh ZPM Hqrs. OB rual ten, kan Inah tawngtai rualna rawn neiin, Pathian kutah min hlan a, an chungah ka lawm hle a ni,” a ti bawk.

Mizoram politics kalphung siamthat a tul tawh zia pawh sawiin ZLP Leader ni bawk chuan, “Siamthat tum thalai rual an pung zel a. Thil thalo ni a kan ngaih, rilru natna min thlentute hi Mizoram politics siamthatna hmanrua a lo ni daih thei a. Keinin vanduainaa kan ruat hi, a hmangaihna lantirtu a lo ni ta zawk a ni,” a ti. Zoram thalaite tunah chuan an harhchhuak mek a, kan hun tawng mek avang hian Mizoram politics siamthat duh an pung zel a, kalphung tha, a ngaihna hria leh hnathawk thei sawrkar siam duhna leh tumna tunhnai mai atang hian a nasa ta hle a, hmun hrang hrangah ZPM zawmthar lawmluh tur an awm ta reng a, hrilêng avangin bawhzui a harsa ta zawk hial a ni, zin theih anih hunah khawtin fang turin kan la rawn chhuak dawn a ni, a ti bawk.

Comments

Chhiar Hlawhte