Aizawl Municipal Corporation huamchhungah chawlhkar khat chhung inkharkhip puan a ni

Health & Family Welfare Minister, Dr. R . Lalthangliana leh Home Minister, Lalchamliana te kaihhruaina a nimin-a sawrkar mi pawimawh hrang hrangte thukhawm chuan tukin dar 4:30 atangin Aizawl Municipal Corporation (AMC) huamchhungah chawlhkar khat chhung Lockdown (inkharkhip) kalpui leh nise an ti.

Nimin tlai-a SAD Conference Hall-a thutkhawm hmanhmawh neih ah hian Mizoram COVID-19 dinhmun uluk taka an thlir hnu ah, Chief Minister Zoramthanga remtihna la in hri leng laka Mizoram mipuite kan him zawk nan leh COVID-19 hri darh chak lutuk ven nan Vawiin, October ni 27, 2020 zing dar 4:30 atanga November ni 3, 2020 zing dar 4:30 (kar khat chhung) thleng Aizawl Municipal Corporation (AMC) huamchhungah lockdown (inkharkhip) nise an ti a. Lockdown boruak azirin a tul anga hemi hnu lehzela kalpui dan tur chu ngaihtuah that leh a ni ang. Hetih rual hian AMC huamchhung ni lo, Mizoram hmun dangah ‘COVID-19 No Tolerance Fortnight’ khauh taka kalpui chhunzawm tur a ni.

He thutkhawm hian tunhnaia Mizoram COVID-19 dinhmun report ngaihthlak a ni a. October ni 18, 2020 atanga niminpiah (October ni 25, 2020) thleng khan AMC area-a Local Council 83 zinga 45-ah COVID-19 hrikai mi 160 hmuhchhuah an ni a. October thla hma a hri kai hmuhchhuah zinga 15% chu symptom neilo an nih laiin, October thla chhunga hri kai hmuhchhuah tawh zinga 33% chu symptom nei an ni thung a. Tunhnai kar khat chhunga COVID-19 hri kai hmuhchhuah tamna veng te chu Zarkawt-ah 28, Dawrpui-ah 11, Zemabawk-ah 11, Chaltlang-ah 9 leh Khatla-ah 8 an ni a. Zirlai 28, zirtirtu 9 leh zirna In-a thawk Non-Teaching Staff 4 te chuan hri an kai bawk a ni. Damdawi In kaihhnawih (hnathawkte leh damdawi In pantute) zingah hri kai 28 an awm tawh a. Chhungkaw member zinga inkaichhawng hi chhungkaw 18 zet an awm tawh bawk a ni.

He thutkhawm neih zawh a nih hnu hian Lockdown chhunga zawm tur inkaihhruaina pawh Disaster Management & Rehabilitation Department hotuten an duang nghal a ni.

Nimin atanga Mizoram puma ‘COVID-19 No Tolerance Fortnight’ hman chu CO-VID-19 Medical Operational Team chuan him tawklo a an ngaih avanga thutkhawm hman-hmawh hi neih nia thudawn a ni a, he hunah hian Mizoram Kohhran Hruaitu Committee (MK-HC) leh Joint NGO Coordination Committee hruaitute bakah Indian Medical Association (IMA) aiawh an tel a, Health, DM&R leh Home Department hotute an tel bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn