Serchhip District-a Zirna In hawn zel dan turah Bawrhsap hovin inrawnkhawmna neih a ni

Hripui leng kara Serchhip District-a zirna In hrang hrang kalpui zel dan tur chungchanga inrawnkhawmna chu nimin khan Serchhip District Bawrhsap, Kumar Abhishek hovin Serchhip-ah neih a ni.

Serchhip DC’s Meeting Hall-a he inrawnkhawmna-ah hian District Task Force on COVID-19 Member te telin sawmbik atangin Serchhip District chhunga Primary School, Middle School leh High School Zirtirtute aiawh bakah Govt. Serchhip College, Eklavya Model Residential School leh JNV Thenzawl aiawhte telin heng Zirtirtute hian zirlai naupangte dinhmun ngaihtuah chung leh kan District chhunga COVID-19 dinhmun thlir chungin zirna In te chu a kalpui leh tan theih tawha an ngaih thu an sawi hlawm a. Amaherawh chu naupang kum 10 hnuailam chin te erawh chu hri leng mekah hri kai awlsam zawk dinhmuna ding an nih avangin la kal tir rihloh tha an tih thu an sawi thung a. School hawn rihloh tur tih a nih laia Private School thenkhat ten an zirlai naupang thenkhat School an kal tir chungchang pawh he hunah hian sawichhuah a ni bawk.

Heng pawl aiawh hrang hrangte ngaihdan thlir chung hian Meeting chuan Serchhip District-ah tun thlengin COVID-19 hri hi mipui vangtlang-ah a la leng lo nia a lan avang leh, mipui nawlpui hi chu kan la him nia hriat a nih avangin Class 6 leh a chunglam te chu tum khatah zirlai 30 aia tamlo zela kal chunga Class neih tan a theih tawhah ngaih a ni tih sawiin, hemi ang hian State sawrkar-a thuneitu sang zawk hnenah ngaihdan thlen nise an ti a. Hei bakah hian zirlai naupang an ngah dan a zirin School hrang hrangte chuan an naupangte inkalchhawk tir dan an ngaihtuah ve thung anga. Sawrkarin SOP a siam te chu an zawm that ni se, Medical lama thawktuten School tina zirtirtute chu COVID-19 laka himna dan a tharin zirtir nawn se, naupang nu leh pa ten an fate chu khawsik emaw, COVID-19 symptom nei chungin School an kal tir tur a ni lo tih intiamna nei bawk se, Class tin tan dawn leh neih zawh hlim ah kutsil vek ni se tih te, School ten Thermal Scanner nei thei se tihte pawh rawtna ah hian telh a ni bawk.

Heng rawtna te hi State Level a thehluh leh tur a ni a, thuneitu sang zawk atangin thutlukna tak tak chu la rawn siam leh tur a ni dawn a ni.