Chanchin thar thenkhat :

Lok Sabha MP in CEC kawm

Mizoram Lok Sabha MP, C. Lalrosanga chuan nimin khan Chief Election Commissioner, Sunil Arora leh Election Commissioner, Sushil Chandra te chu an Office-ah tlawhin Delimitation Commission hmalakna te leh Mizorama inthlanpui buatsaih dan chungchang te a sawipui a. Sunil Arora chuan Mizorama inthlanpui buat-saih dan te chu fel leh tha a tiin state dangte nena khaikhinin mimal senso pawh a tlem hle a ni, a ti. C. Lalrosanga hian Director General Door-darshan-a hna a thawh laiin Arora hi Information and Broadcasting Secretary niin hun eng emaw chhung Sunil Arora kaihhruaina hnuaiah a lo thawk tawh a. Sunil Arora chuan MP hial a lo ni ta chu zau zawka mipui rawngbawl theihna hun tha zawk a nei thei ta a ni, tiin lawmpuina leh duhsakna a lo hlan a ni.


SRDC Council Meeting nei

Sialkal Range Development Council (SR-DC) hnuaia Council Meeting chu nimin khan neih a ni a, thu pawimawh hrang hrang an rel zingah SRDC Manual ennawnna leh siamthat chung-chang te, Council huamchhunga School hrang hrang a zirtirtu indaihlohna chungchang te telin, Council pawisa atangin heng zirtirtu indaihlohna khua ah hian zirtirtu rawih nise tih a ni a. Zirlai lehkha thiam thei, khawsak harsa te pawh kumdanga tih thin angin tanpuina pek nise an ti bawk.


Speaker in lungphum phum

Chalfilh bial fang-a zin Assembly Speaker, Lalrinliana Sailo chuan nmin khan Suangpuilawn khua ah Primary Health Centre (PHC) sak that hna thawhna turin lungphum a phum a, Suangpui-lawn PHC hi hun rei tak atang tawh khan Dispensary a bultan a ni a.Kum 2000 khan PHC ah hlankai niin hemi hma hian SHC tia sawi thin a ni a. Tuna Building hi kum 1998-a luah tan niin a Building hi a upat tawh avang leh a chhiat tawh avangin tunah hian sak that turin hna thawh tan leh mek a ni. Damdawi In sak that rual hian Staff Quarters te pawh sak that nghal a ni ang.


LADC-ah BJP sawrkar a ding

Lai Autonomous District Council (LADC)-a Sawrkarna chelh mektu, Congress Legislature Party chuan nimin khan BJP Legislature Party an din thu LADC Deputy Chairman, LR. Dingliana Chinzah hnenah an thlen a, LADC-ah BJP sawrkar a ding nghal a ni. Kum 2015-a LADC inthlanpui neih ah khan Seat 25 awmna ah INC chuan Seat 16 changin, MNF in Seat 8 leh Independent in Seat 1 lain tunah chuan BJP sawrkar a ding ta a ni.


Pig Breeding Farm tlawh

Mizoram-a Registrar of Cooperative Societies, Lalrinsanga chuan nimin khan Thenzawl a PIGFED Ltd. Pig Breeding Farm chu a tlawh a, helai hmun hi Vawkpui 100 vulh theihna tura tih changtlun niin tunhnai khan cheng nuai 119 pek a ni a, tunah hian Yorkshire Vawk 60 vulh mek a ni. Lalrinsanga hian Thenzawl-a Handloom Cooperative Society hruaitute kawmin an hma-sawnna tur hrang hrang a sawipui bawk.


Kum 2019-ah naupiang 23,808; mitthi 6606 an awm

Kum 2019 chhung khan Mizoram-ah nausen piang 23,808 awmin mitthi 6606 an awm anga chhinchhiah a ni. Mizoram Planning Economic & Statistical Service (MPE&SS) Orientation Programme khar paha Vawiin a tlangzarh ‘Annual Report of Birth & Deaths 2019’ ah he thu hi tarlan a ni a, he Report a tarlan a nih danin kum 2019 chhung khan Mizoram-ah nausen piang 23,808 awmin, mitthi 6606 an awm anga chhinchhiah a ni a, naupiang zingah thi sa-a piang (Still Birth) 83 an awm bawk a. Mizoram Population atanga chhutin Birth Rate hi za zelah 18.05 niin Death Rrate hi za zelah 5.01 a ni thung.

Comments

Chhiar Hlawhte