/

Serchhip District Hospital OPD-a damlo inentir tur leh Casualty pan te zinga COVID-19 hri kai nia rinhleh te chu Damdawi In hungchhung lut lova Rapid Antigen Test (RAgT) an neih nghalna tur ruahmanna siam a ni.

Serchhip District Medical Superintendent, Dr. ZD. Lalmuanawma chuan tunhnaiah Serchhip District Hospital OPD pantu zingah COVID-19 hri kai hmuhchhuah an awm tak avangin damdawi In pantu mipuite leh thawktute an fimkhur-a hri leng laka an him theihna turin hma an lak mek thu a sawi a, heng OPD pantu leh Emergency-a Casualty pantu zingah COVID-19 hri kai lanchhuahna nei nia ngaih theih leh thawktute tan pawh lo fimkhur ngai te a awm avangin heng mi ten fimkhur taka damdawi In hungchhung lut lova COVID-19 Test an neih theihna tur hian ruahmanan an siam tak thu a sawi a, hemi atan hian Serchhip District Hospital tual-a Morgue House-ah Sample enfiahna tur hmun hi an siam thu leh nimin atang khan Sample enfiah hna pawh thawh nghal a nih thu a sawi a, hetianga damdawi In pantu zinga rinhlelhawm leh mahni in ringhlel te tan hian Rs. 500/- zel chawiin sample hi enfiah theih a nih dawn thu a sawi bawk.

Hetihlai hian COVID-19 hri leng dona kal zelah Serchhip-a damdawi In pahnih-a Ventilator pahnih ve ve sawrkar in a rawn pek te chu hman theih tura bunfel a ni tawh a. COVID-19 hri leng dona kawnga hmalakna kal zelah hian sawrkar laipui-a Ministry of Health and Family Welfare chuan Mizoram sawrkar hnenah Ventilator hi 115 a rawn pe a, heng te hi Mizoram sawrkar chuan Mizoram khawpui hrang hrangah semdarh ve lehin Serchhip-a damdawi In pahnih- District Hospital leh Mercy Hospital (Rural Diagnostic & Research Centre) te chuan pahnih ve ve changin heng te hi nimin khan hman theih tura bunfel a ni ta a ni. Heng Ventilator rawn pek thar te hi niminpiah tlai khan District Hospital, Serchhip-ah mithiam ten bunin nimin chawhma lam khan Mercy Hospital-ah hian bun leh a ni a, heng khawl rawn buntute hian nimin vek khan Saitual panin Ventilator hi an bun leh dawn a ni.

Ministry of Health and Family Welfare in Mizoram sawrkar hnenah Ventilator a pek hi Digital CVM (VC) Agva Ventilator niin pakhat hi cheng nuai hnih man vel a ni a, he khawl hi Serchhip District Hospital-ah chuan Sick Room-ah bun a nih thu thawktute chuan an sawi a ni. Serchhip District Medical Superintendent chuan Serchhip-a TRAUMA Centre zauhna hna thawh mek leh helai hmuna ICU dah tum mek pawh he khawl rawn buntute nen hian an enfiah thu sawiin, thla thar November thla chhung hi chuan hman theih tura peihfel theih an inbeisei thu a sawi bawk.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »