Aizawl-ah hri kai hmuhchhuah an pung chho zel

Niminpiah-a Mizoram-a Sample enfiah atangin COVID-19 hri kai mi 80 zet hmuhchhuah leh an ni a, heng zinga mi 76 te chu Aizawl District-a hri kai hmuhchhuah niin midang 4 te chu District dang-a hri kai hmuhchhuah an ni thung.

Niminpiah khan ZMC Laboratory-a Sample enfiah atangin COVID-19 hri kai mi 71 hmuhchhuah niin an vai hian Aizawl District-a hri kai hmuhchhuah vek an ni a, Rapid Antigen Test hmanga hri kai hmuhchhuah 7 zinga mi 5 te chu Aizawl District mi bawk an ni. Nimin-a ZMC atanga hri kai hmuhchhuah mi 71 zinga mi 69 te hi Aizawl Municipal Corporation huamchhung Veng 27 atanga hri kai hmuhchhuah niin NEUHOFF School Chanmari atangin hri kai 18 hmuh an nih bakah Ebenezer Boarding School, Zemabawk atangin hri kai mi 6 hmuh an ni bawk a, Aizawl Falkland-a hri kai hmuhchhuah pakhat chu a hmaa hri kai lo enkawl dam tawh, CCC atanga chhuah tir hnu leh hri kai nawn leh a ni bawk. Hri kai hmuhchhuah zingah hian Beraw Quarantine Centre a khunghran lai mi 10 zet an tel bawk a ni.

Niminpiah-a hri kai hmuhchhuah dang te hi Lawngtlai leh Khawzawl-ah State pawn atanga rawn haw mi pakhat ve ve bakah Ngopa leh Sangau atangin mi pakhat ve ve an ni bawk.

Heti hian nimin thleng khan Mizoram-ah COVID-19 hri kai hmuhchhuah chu mi 2607 an tling ta a, an zinga mi 2238 te chu enkawl dam ni tawhin tunah hian hri kai enkawllai 368 an la awm mek a, hri kai zingah nunna chan mi pakhat a awm tawh bawk a ni.

India-ah hri kai enkawl dam zat an pung zel :

Darkar 24 kalta chhungin India ramah COVID-19 hri kai hmuh-chhuah thar 43,893 an awm laiin hri kai enkawl dam 58,439 an awm a, nunna chan mi 508 an awm bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 10,66,786 enfiah leh niin heng atang hian COVID-19 hri kai mi 43,893 hmuh leh an ni a, tun thlengin India ramah Sample enfiah 10,54,87,680 atangin hri kai hmuh chu 79,90,322 an tling ta a, India rama Sample enfiah zawng zawng atangin zaa 7.57 te chuan hri hi an kai a ni.

Darkar 24 kalta chhung khan India ramah hian hri kai 58,439 te chu enkawl dam leh niin tun thlenga hri kai enkawl dam chu 72,59,509 an tling tawh a, hei hi hri kai hmuhchhuah atangin zaa 90.85 niin tunah hian hri kai enkawllai 6,10,803 an la awm mek a, hei hi hri kai atangin zaa 7.64 a ni bawk. Darkar 24 kalta chhungin India rama hri kai zingah nunna chan pung leh hlekin mi 508 an thi leh a, tun thlenga hri kai zinga nunna chan chu 1,20,010 niin hei hi hri kai hmuh tawh atanga chhutin zaa 1.50 a ni bawk.