Latest News

Mizoram-ah hri kai 13 hmuh belh an ni; Hri kai enkawl 165 chiah awm tawh

Inrinni-a Mizoram-a Sample enfiah atangin COVID-19 hri kai mi 13 hmuh belh leh an ni a, Aizawl Tuikual Veng-ah chhungkaw pakhat a mi 6 te chuan hri an kai tih hmuhchhuah a ni.

Inrinni khan ZMC Laboratory-ah Sample 173 enfiah niin heng atang hian hri kai mi 2 hmuh an ni a, BSF Sipai niin inkhunghranna hmuna awm lai ve ve an ni. District hrang hranga TrueNat Laboratory-ah Sample 113 enfiah niin hri kai mi 2 hmuh an ni bawk a, pakhat hi Serchhip District-a hri kai hmuhchhuah leh Company hnuaia thawk niin hri kai hmuhchhuah pakhat hi Lawngtlai Dsitrict-a hmuhchhuah, Delhi atanga rawn haw a ni bawk.

Rapid Antigen Test hmangin Sample 172 enfiah ni bawkin hri kai 9 hmuh niin an zinga mi 6 chu Aizawl Tuikual Veng mi, chhungkaw pakhat niin an zingah hian nausen thla 8 mi a tel a, taksa a hri kai lanchhuahna neih avanga enfiah an nih hnuah hri an kai tih hmuhchhuah a ni. RAgT hmanga hri kai hmuh pakhat hi Lengpui Airport-a hri kai hmuh niin Kolasib District-a Vairengte-ah hri kai 2 hmuh an ni bawk.

Hri kai enkawl 165 chiah awm :

Mizoram-a COVID-19 hri kai zingah zaa 92.41 zet enkawl dam ni tawhin tunah hian hri kai enkawllai mi 165 chiah an awm tawh. Sawr-kar chhinchhiahna atanga a lan danin nimin khan Mizoram hmun hrang hranga COVID-19 hri kai mi 26 te chu anmahni enkawlna hmun atanga chhuahtir leh an ni a. Nimin thleng khan Mizo-ram-a hri kai hmuhchhuah tawh zawng zawng chu 2175 niin an zinga mi 2010 te chu enkawl dam an ni tawh a, tunah hian hri kai enkawllai 165 chiah an awm tawh a ni. District hrang hrang zinga hri kai enkawl tamna ber chu Lunglei District niin mi 62 enkawl mek an ni a, Lawngtlai District-ah mi 40 enkawl niin Aizawl District-ah mi 36 enkawl an ni bawk a, Siaha, Khawzawl leh Hnahthial District-ah te chuan hri kai enkawl an awm tawh rihlo thung a ni.

Comments

Popular News (Last 30 Days)