Chanchin thar thenkhat :

Sangha fuan rut lo turin chah

Fisheries Department Minister, K. Lalrinliana chuan Zoram mipuite chu Sangha fuan rut lova, Sangha fuan leh Luidung Nungchate venhimpui turin a sawm. Mipuite hnena thuchah a siamah Fisheries Minister chuan tunlai chho hi Mizoram luidung-ah Sangha fuan hunlai a ni tih sawiin, Mizoram Fisheries Amendment Act 2016, Section 5(1) tlawhchhanin Oct. ni 15 atanga Nov. ni 15 chhung chu Sawrkar chuan ‘Closed Season’ atan puangin, hemi hunchhung hian tumah Sangha fuan rut lo tura hriattir an nih thu a sawi a. He dan hian Sangha Fuan tur tihbuai khapin, dan bawhchhetute chu pawisa chawi leh lung In tan thlengin hrem theih an ni tih a sawi bawk.

MP in DoNER Minister hmu

New Delhi a cham mek Mizoram Lok Sabha MP, C. Lalrosanga chuan niminpiah khan DoNER Minister, Dr. Jitendra Singh chu hmuin Mizoram a hmasawnna hnathawh mek leh thawh tum thenkhat a sawipui a. Lok Sabha MP chuan DoNER Minister hi Mizoram khaw 19 a bawlhhlawh sawng-bawlna hmun (Solid Waste Management Centre) din rawtna te a sawipui a. Lunglei khawpui tan bika bawlhhlawh paih leh sawngbawlna hmun dinna tura sum tlema zawng an pek tawh bak, instalment dang an dil leh te chu an OSD nena lo indawr zui tura tih chu a bawhzui nghal a.OSD IRS Officer hian Ministry lam te phone nghalin hemi ni tlai la la hian MP chu rawn phone leh nghalin,Lunglei khawpui tana bawlhhlawh sawngbawlna tur sum hi a fel thuai a rin thu a rawn hrilh a ni.

Hostel te dinhmun enfiah

Hripui leng avanga zirna In te hun rei tak hawn mumal theihloh a nih hnuah Vawiin, Oct. 16, 2020 atang hian Board Exam hmachhawn tur zirlaite tan School hawn anih dawn tak avangin nimin khan School Education Department a Officer-ten Hostel dinhmun endikin hri leng lakah a him leh himloh an enfiah a, Hostel enfiah hi a tul anga chhunzawm zel tur a ni ang.

ZPM in lungchhiatthlak an ti

ZPM General Hqrs. chuan nimin khan thu-chhuah siamin tunhnaia Assam leh Mizoram ramri a thil thleng chungchangah Mamit leh  Karimganj DC-in inbiakna an neih ah Mizoram aiawha tel Mamit DC in Thinghlun khaw ram chu Mizoram chhung ngei a nih thu huai taka tang ngam lova, 'Kan pi leh pu te atanga ta anga kan lo en thin' ang leka Mizoram sawrkarin a lo ngai chu a lungchhiat-thlak hle tih an sawi a. Thinghlun VLTF duty-na bûk Assam lamin an ramchhung anga chhâl a, an rawn ngaimawh avanga 'Mizoram sawrkar  thupêk ngeia hâl' a nih avangin Assam hi rawn pawng-pawrh ah an ngaih thu an sawi bawk.

ZORO in MZP an thlawp

ZORO General Hqrs. chuan nimin khan Executive Committee thutkhawm neiin tunhnaia Assam leh Mizoram ramri-a thil thleng chung-changa MZP hmalakna chu an thlawp thu an sawi. Nimin a ZORO Office-a thutkhawm ah hian Thinghlun khaw daia John Zolawma Thlam Assam Sawrkarin an lo halsak leh an huan thlai te an tihchhiat sak chu an dem hle tih an sawi a. John Zolawma Thlam sak that a nih theih nana MZP in hma a la chu lawmawm an tih thu sawiin ZORO chuan, MZP in ramri chungchang a hma a lakna chu an thlawp thu leh, Mizo mipui zawng zawng te tanrualna tur a nih avangin Zofa zawng zawngte thlawp tlat turin a sawm nghal bawk.

Hei bakah hian Joint Action Committee (JAC) on Inner Line Reserved Forest Demand ten Mizoram leh Assam ramri chungchang ah Union Home Ministry in Mizoram Sawrkar chu ramri chungchanga Mizoram leh Assam ramri chin tichiang a comment pe tura a lo tih Mizoram Sawrkar in chhhanna a la pek loh chungchang a chhanna pe tura Mizoram Sawrkar an nawr chu ZORO chuan a thlawp tlat tih pawh an sawi a, Joint Action Committee (JAC) on Inner Line Reserved Forest Demand te hmalakna hi a tawp thlengin a thlawp tlat zel dawn tih an sawi bawk.

MZP in Thlam sak an zofel

Tunhnaia Assam sawrkar mi leh sa nia hriat ten Mamit District chhung Thinghlun khuaa John Zolawma Thlam an halchhiat sak that hna MZP General Hqrs. bultuma thawk chu nimin khan an zofel ta a, he Thlam sak hna thawk tura kal MZP General Hqrs. hruaitute pawhin nimin vek khan Thinghlun chhuahsanin Aizawl lam an pan nghal a ni. Nimin vek khan ZPM General Hqrs. chuan thuchhuah siamin Mizoram humhalhna kawnga huaisen taka hma la thin leh tlanchhe ngai lo MZP in John Zolawma Thlâm an sa tha chu fakawm an tih thu leh an thlawp tlat thu an sawi bawk.