Mizoram Rajya Sabha MP in RIPANS harsatna a thlen

New Delhi-a cham mêk Mizoram Rajya Sabha MP, K. Vanlalvena chuan nizan hmasa khan Union Secretary of Health and Family Welfare, Rajesh Bhushan chu a Office Chamber-ah kawmin RIPANS Aizawl-in harsatna a tawh mek chungchang a sawipui.

RIPANS-ah hian Contract Basis-a thawk mek mi 91 an awm a, heng mite hna thawh tur hun chhung hi pawhsei sak lo turin kumin January 2020 khan Central sawrkar in RIPANS thuneitute a rawn hriattir avangin an hna an chawlhsan a, amaherawh chu thawktu nghet mi 85 chauh an awm avangin Exam pawh buatsaih theih a ni lo a ni.

India rama Para-Medical and Nursing Science Institution awmchhunin hetiang harsatna a tawk hi sutkian a nih theih nan Mizoram Health and Family Welfare Department changtu Minister, Dr. R. Lalthangliana chuan August 10 leh September 21-ah Union Secretary leh Joint Secretary for Health Department-ah te ngenna a lo thlen tawh a. He hmalakna bawhzuiin Rajya Sabha MP hian Health Secretary hi hmuin Health Secretary hian File khawihtu Addl. Secretary Arti Ahuja-i chu a ko nghal a. RIPANS harsatna sukiang tur hian thutkhawm an neih nghal tur thu leh ni 2/3 hnuah Mizoram sawrkar an rawn be pawp ang a, chanchin thar a awm thuai ang tih an lo hrilh nghal a ni.