Kumin ah Serchhip District-ah TB vei mi 50 hmuhchhuah an ni tawh

Nikum (2019) January atanga August thla aiin kumin a hemi hun chhung hian Serchhip District-ah TB vei hmuhchhuah an tlem zawk a, kumin chhungin Serchhip District-ah TB vanga nunna chan mi pahnih an awm tawh thung.

District TB Centre, Serchhip atanga thu kan dawn danin nikum (2019)-a thla 8 (January atanga August) chhung khan Serchhip District-ah TB kai mi 60 hmuhchhuah niin kumin (2020) a hemi hun chhung hian TB kai mi 50 hmuhchhuah an ni thung a, nikum aiin kumin hian thla 8 chhungin TB kai hmuhchhuah hi mi 10 in an tlem zawk a ni. Nikum 2019 chhung khan Serchhip District-ah hian TB kai hi mi 94 hmuhchhuah niin nikum kumtluan aiin kumin kumtluan in TB kai hmuhchhuah hi tlem zawk tura beisei a ni bawk. Hetihlai hian kumin chhunga TB kai mi 50 hmuhchhuah bakah hian TB dam har chi, MDR-TB kai chu Serchhip District-ah mi 4 hmuhchhuah an ni tawh bawk a, kumin hian TB kai mi 14 te chu enkawl dam ni tawhin TB vanga nunna chan mi pahnih an awm tawh bawk a ni.

Serchhip TB Centre-a thawktute chuan TB natna kai hmuhchhuah te hi a thlawna damdawi pe-a enkawl thin an nih thu sawiin, thla ruk (6) chhung enkawlna pek an nih thu an sawi a, heng TB kai te hian TB damdawi an ei ruala chawtha an ei theihna turin damdawi an ei chhung hian thla tin Rs. 500/- pek thin an nih thu leh enkawl dam an nih-a Treatment an lak zawh hnu hian Rs. 750/- pek leh thin an nih thu an sawi a, heng pawisa te hi a sumfai-a pe lovin Bank Account kaltlang veka pek thin an nih thu an sawi bawk.

Tunhnaia tihchhuah tak ‘Statistical abstract of Mizoram 2019’ tarlan a nih danin kum 2018-2019 chhung khan Mizoram-ah TB hrik kai mi 2,926 hmuhchhuah niin kum 2009-2010 hnu lama TB hrik kai hmuhchhuah an tam ber tum a ni a, he chhinchhiahna atanga a lan danin kum 2018-2019 chhung khan Mizoram pumah mi 17,171 enfiah niin heng atang hian TB hri kai 2,926 hi hmuh an ni a, hemi hun chhung hian Aizawl District chu TB hrik pai hmuhchhuah an tam berna District niin TB kai 2,049 zet hmuh an ni a, Lunglei District in dawtin mi 198 hmuh an ni thung. Kolasib District chu TB hri kai hmuhchhuah tam lamah pathumna niin mi 169 hmuh an ni a, Champhai District-ah 147; Siaha District-ah mi 133; Lawngtlai District-ah mi 104; Serchhip District-ah mi 96 leh Mamit District-ah mi 30 hmuh an ni bawk.