Mizoram-ah hri kai hmuhchhuah 2120 an tling tawh

Inrinni-a Mizoram-a Sample enfiah atangin COVID-19 hri kai mi 17 hmuhchhuah leh an ni a, Mizoram-a hri kai hmuh zawng zawng pawh 2120 an tling tawh.

Inrinni-a Mizoram-a hri kai hmuhchhuah zingah hian Mizoram-a hri inkaidarh an awmlo niin a lang a, hri kai hmuhchhuah te hi State pawn atanga rawn lut vek niin District hrang hrang TrueNat Laboratory-a Sample enfiah atanga hri kai hmuhchhuah an ni a, Lunglei District atangin hri kai 13 hmuhchhuah niin BSF sipai mi 12 leh Indian Air Force mi pakhat te an ni. Champhai District-ah hri kai pahnih hmuh ni bawkin Civil mi, tunhnaia State pawn (Assam) atanga rawn haw ve ve an ni a, Mamit leh Lawngtlai District-ah hri kai pakhat ve ve hmuh niin Mamit District ami hi Assam atanga rawn haw a ni a, Lawngtlai District-a hri kai hmuhchhuah te hi RK-RPP Road Construction Company Engineer hnuaia thawk, Himachal Pradesh atanga rawn kal a ni.

Inrinni zan ZMC Laboratory-ah Sample 169 enfiah niin hri kai hmuh an awm lova, Rapid Antigen Test hmangin sample 366 enfiah niin hri kai hmuh an awm lo bawk a ni.

Mizoram-ah COVID-19 hri kai hmuhchhuah hi 2120 an tling ta a, an zinga mi 1791 te chu enkawl dam ni hri kai zinga zaa 84.48 enkawl dam an ni tawh a, hri kai enkawllai 329 an la awm mek a ni.

India-ah COVID-19 vanga nunna chan nuai khat tling :

India ramah COVID-19 hri kai nunna chan chu mi nuai khat an tling ta a, darkar 24 kalta chhung khan hri kai zingah nunna chan mi 940 an awm leh bawk. Ministry of Health & Family Welfare chhinchhiahna atanga lan dan danin darkar 24 kalta chhunga India rama hri kai nunna chan mi 940 te nen hian tun thlenga India rama hri kai nunna chan chu mi 1,01,782 an tling tawh a, India rama State leh UT 35-ah hri kai hi hmuh ni tawhin chung zinga 34-ah chuan nunna chan an awm tawh a, Mizoram chauh chu nunna chan awmlohna ala ni zel a ni.

Chhinchhiahna atanga a lan danin darkar 24 kalta chhung khan India ramah Sample 11,42,131 enfiah leh niin heng atang hian hri kai thar 75,829 hmuh leh an ni a, heng te nen hian tun thlengin India ramah Sample enfiah zawng zawng chu 7,89,92,534 niin hri kai hmuh zawng zawng pawh 65,49,373 an tling tawh a, Sample enfiah atanga zaa 8.29 te chuan hri an kai tawh a ni.

Darkar 24 kalta chhung khan India ramah hri kai 82,260 enkawl dam awmin heng te nen hian hri kai enkawl dam chu 55,09,966 an tling tawh a, hei hi hri kai hmuhchhuah atangin zaa 84.12 niin tunah hian hri kai enkawllai 9,37,625 an la awm mek a, hri kai hmuhchhuah atangin enkawl dam hi an pung hret hret a ni.