Health Minister, Dr. R. Lalthangliana chuan COVID-19 hri leng mek karah mipuite inthlahdah lo tura chahin, keimahni mai bakah midangte tan kan fimkhur a ngai tih hre reng turin a chah a. “Tun dinhmun kan thlen theihna chhan leh tun thlenga harsatna lian lutuk tawk lova kan la awm theihna chhan hi kan zavaia kan thawhhona rah a ni,” a ti.

Mipuite hnena nimin-a Cable TV leh AIR kaltlanga thuchah a sawi ah he thu hi sawiin Health Minsiter, Dr. R. Lalthangliana chuan Mizoram-a  COVID-19 Data Official a buaipuitu ber,  Integrated Disease Surveillance Programme (IDSP)  chhinchhiah danin Mizoram pumah COVID-19 sample 82,610 enfiah tawh niin positive hmuhchhuah zawng zawng 2120 an awm thu leh heng zinga 871 (41.09%) hi Mizoram leilung fate niin, 1249 (58.91 %) hi ram leilungfa ni lo, hnamdang kan tihte an ni tih a sawi a. Positive hmuhchhuah zawng zawng zinga 1522 (71.79%) chu Mizoram pawn atanga lo lut, Travel history nei te an nih thu leh, tualchhunga inkaidarh (local transmission) chu 598 (28.21%) an ni tih a sawi a. Mizoram-a hri kai hmuhchhuah zînga 831 (39.19%) chu Para-Military Forces leh Indian Army te an ni tih pawh sawiin, mi 185 (8.72%) chu Truckers ho, bungraw rawn phurlut thinte niin 1104 (52.07%) hi Civil mi an ni tih a sawi.

Health Minister chuan Mizoram-ah Sample lak a tam tak em avângin test result tihchhuah kawngah duh angin a kal chak theih lo tih pawh sawiin, heti chunga dawh thei taka an lo nghah thin avangin lawmthu a sawi a, “ZMC Laboratory-a thawktuten theihtawp an chhuah a, tunah chuan backlog nei tawh lovin nikhat thilthu ah Sample dawnkhawm te kan test zo thei ta zel a, a lawmawm takzet a ni,” a ti.

COVID-19 hrileng lakah kan dinhmun a ziaawm chho deuh ni a a lan rual hian kan inthlahdah phah ang tih a hlauhawm thu sawiin Health Minsiter chuan, fimkhur takin awm chhun-zawm zel turin mipuite a chah a, “COVID-19 hri thar ‘Novel coronavirus’ a nih avangin a nihphung zirchian mek zêl a ni,” a ti bawk.

Laboratory chungchanga an hmalakna pawh sawiin Health Minister chuan Falkawn Referral Hospital building-a TB Laboratory BSL-3 chu hmanhmawh taka cheibawla hman a nih thu leh ZMC-ah hian Viral Research Diagnostic Lab (VRDL) kan nei dawn hnai tih a sawi a. “Virus hmuhchhuahna Laboratory chang-kâng tak a ni a, COVID-19 kher ni lo, Virus chi hrang hrang zirchianna (research) tur a ni a, hripui lêng dang lo awm leh thulhah pawh la tangkai tak tur ro (asset) a ni,” a ti a. “Hemi atan hian ZMC-a COVID-19 Sample test na Laboratory chung saw kan buatsaih mek a, he Laboratory leh a ken tel thil zawng zawng hi ICMR in a rawn tum vek dawn a, State sawrkar senso tur pakhatmah a awm dawn lo a ni,” tiin kumin kumtawp lamah chuan hman theih beisei a nih thu a sawi bawk.

Dr. R. Lalthangliana chuan Unlock 4 chu October thla chhung atân kan hmang mêk tih pawh sawiin, “A hma aiin kan han inthlah zalen hret hret a, kan fimkhur zual sauh erawh a tul tih hre nawn theuh ila, ei leh bar bakah nitina kan eizawnna kawng kan zawh kawngah mitinin mawhphurhna kan nei lian em em a ni tih hre thar nawn fo turin ka chah duh che u,” a ti a. Thil tul tâwpkhâwk ah lo chuan pâwn chhuak lo tur leh, thenawm khawvêng inlênpawh pawh tul tawpah lo chuan i insum chhunzawm rih hram hram turin a chah bawk.

Tun dinhmun kan thlen theihna chhan leh tun thlenga harsatna lian lutuk tawk lova kan la awm theihna chhan chu kan zavaia kan thawh-hona rah a ni tih sawiin Health Minister chuan, “Kan rin Pathian in kan tawngtaina a chhâng a, a mite min phatsan lo a ni tih a lang chiang hle in ka hria,” tiin bang lova tawngtaia fimkhurna thlahdah lo turin mipuite a chah bawk a ni.

Comments

Chhiar Hlawhte