MNF NCC in sawrkar hmalakna tha an ti

MNF Party-a thuneitu sang, National Core Committee (NCC) thukhawm chuan COVID-19 hri leng doletna chungchanga sawrkarin theihtawp chhuaha hma a lak dan chu tha an tih thu an sawi.

MNF National Core Committee (NCC) hi niminpiah khan an Party President, Zoramthanga hova thukhawmin tunlai khawvel pumpui chawkbuaitu hripui leng mek, COVID-19 in Mizoram min tihbuai dan leh a doletna chungchanga hmalak dante thlirhona neiin Sawrkarin theihtawp chhuaha hma a lak dan chu tha tiin, Pathian zarah hripui avanga nunna chan kan la awm lo leh India rampum huap pawha COVID-19 donaa titha ber State kan ni te chu lawmawm an tih thu an sawi a. Hetiang kan nih theihna chhan hi ram mipuite tanrualna leh thuawihna avang leh nasa taka Pathian hnena kan tawngtai min chhanna a ni tih sawiin, Pathian hnenah leh mipuite hnenah lawmthu an sawi bawk.

MNF National Core Committee thukhawm huan, tun thlengin COVID-19 hripui leng nen kan la inchiahpiah mek zel avangin MNF Block inthlanna buatsaih pawh a hun tawh viau nain, tun ang dinhmunah chuan inthlanna buatsaih chiah an ngai lova, MNF Dan Bu Bung 9 Chang 44-na in National Core Committee thuneihna a pek angin, Block hruaitu turte chu a ruata inruat thar mai nise an ti bawk.