Serchhip District-ah COVID-19 hri kai mi 36 zet enkawl dam leh an ni

Serchhip District-a COVID-19 hri kai enkawl mi 36 zet te chu enkawl dam an nih hnuah nimin khan anmahni enkawlna hmun atanga chhuahtir an ni a. Serchhip District bikah hri kai hmuhchhuah thar pakhat awm lehin hri kai hmuhchhuah atanga zaa 74.19 te chu enkawl dam an ni tawh bawk.

Serchhip CMO Office atanga thu kan dawn danin nimin-a COVID-19 hri kai enkawl dam an chhuahtir tak te hi BSF Sipai te vek niin anmahni enkawlna hmun, Nursing School CCC atanga chhuahtir an ni a, an zinga mi pahnih te hi Serchhip District-a hri kai hmuhchhuah te niin midang 34 te erawh Aizawl District atanga hri kai hmuhchhuah leh Serchhip District-a enkawl tura rawn dah an ni a, Rapid Antigen Test hmanga enfiah an nih hnuah hri lakah an fihlim tih finfiah niin nimin khan chhuahtir an ni ta a ni.

Hetihlai hian niminpiah khan Serchhip District-ah COVID-19 hri kai pakhat hmuhchhuah belh leh a ni a, thudanin niminpiah khan Serchhip-a TrueNat Laboratory-ah Sample 30 enfiah niin heng atang hian hri kai pakhat hi hmuhchhuah niin mipa kum 21-a upa, Thenzawl-a Horticulture College sak hna thawk mektu, Tribeni Construction Limited hnuaia hnathawk niin September 26-a Assam atanga rawn lut leh inkhunghranna hmuna awm mek niin taksa-a natna lanchhuahna neilo a ni a, hri a kai tih hmuhchhuah a nih hnu hian Thenzawl AYUSH Hospital CCC-ah enkawl tura dahluh nghal a ni. Niminpiah vek khan Serchhip District-ah Rapid Antigen Test hmangin Sample 15 enfiah niin hri kai hmuhchhuah erawh an awmlo thung a ni.

Heti hian nimin thleng khan Serchhip District-ah COVID-19 hri kai mi 62 hmuhchhuah an ni tawh a, an zinga mi 46 te chu enkawl dam ni tawhin tunah hian hri kai enkawllai 16 an la awm mek a, Serchhip District-a hri kai hmuh-chhuah atangin zaa 74.19 te chu enkawl dam an ni tawh a ni. District dang atanga hri kai en-kawl tur an rawn dah te nen tun dinhmuna Ser-chhip District-a hri kai enkawllai chu mi 29 an la ni thung a, heng zinga 24 te chu BSF Sipai niin Nursing School CCC-ah dah an ni.

Comments

Chhiar Hlawhte