MHA Joint Secretary (NE) in Mizoram Governor leh Chief Minister te a kawm

Ministry of Home Affairs-a Joint Secretary (North East) Satyendra Garg chuan nimin khan Mizoram Governor, P.S. Sreedharan Pillai leh Chief Minister, Zoramthanga te chu an chenna In ah kawmin Mizoram leh Assam ramri inkara innghirnghona awm chinfel chungchanga hmalakna a sawipui.

Raj Bhavan-a Mizoram Governor a kawmna ah hian Joint Secretary (North East) Satyendra Garg chuan niminpiha-a Silchar a thlen hnuah Mizoram Governor in Union Home Minister, Amit Shah hnena ramri chungchanga lehkha a thawn pawh a hmuh tawh thu a sawi a. Home Ministry chuan ramri buaina hi chinfel thuai a duh tih sawiin, Tlawmngai pawl ten inbiak an duh avangin Chief Secretary in a sawm thu leh chumi avanga rawn kal a nih thu a sawi bawk. Governor hnenah hian Silchar, Assam-ah boruak muanawm tak hnuaia rei tak chhung ama kaihhruaina hnuaiah Mizoram Home Secretary leh Assam Home Secretary ten ramri chungchanga buaina awm mek chinfel dan tur an sawiho tih a sawi a. Ramri buaina chungchanga Mizorama tlawmngai pawl te hmalakna lawmawm a tih thu sawiin, YMA te nen pawh an in hriat that thu a sawi a, tlawmngai pawl hrang hrangte nen inbiakna tha tak pawh an neih a beisei thu leh Silchar-a State pahnihte inbiakna tha tak atang hian State pahnih te inkarah inremna a awm thuai a beisei thu a sawi bawk.

He hunah hian Mizoram Governor P.S. Sreedharan Pillai chuan ramri chungchanga Mizoram sawrkar leh Mizoram mipuite dinna a sawifiah a. He ramri buaina hi Sawrkar laipui kaihhruaina hnuaiah a ranglam a chinfel thuai tul tih thu a sawi bawk.

Satyendra Garg hian Chief Minister, Zoramthanga chu CM Bungalow-ah kawm bawkin niminpiah-a Silchar-a Mizoram leh Assam sawrkar aiawh te inbiakna chungchang a hrilh a, he an inbiakna ah hian Mizoram-a rawn lut tur lirthei a pangngaia a tlang theih chu ngaih pawimawh hmasak a nih angin tihhlawhtlin a nih thu a hrilh a. Sawrkar laipui chuan State pahnih inkar boruak muanawm tak awm a duh thu sawi bawkin, ramri chungchanga inhmuhthiamlohna awm pawh chu State pahnihte tana pawm awm tur inremna siam a nih thuai a beisei thu a sawi a ni.

Chief Minister, Zoramthanga chuan Assam leh Mizoram inkar ramri buai avanga innghirnghona chu a reh thuai a duh thu leh boruak tha zawk a awm theih nan theihtawp Mizoram-in a chhuah thu Satyendra Garg hi a hrilh a. Hetihrual hian Tripura nen kan inrina chungchangah erawh harsatna a awm loh thu a hrilh bawk a ni.

Joint Secretary (North East), Satyendra Garg hian Chief Secretary, Lalnunmawia Chuaungo pawh a kawm bakah ramri a thil thleng chungchangah hian NGO Coordination Committee te nen Chief Secretary Conference Hall-ah an thukhawm bawk a ni.