COVID-19 hri kai te enkawlna chungchang thlirho

Health Minister, Dr. R. Lalthangliana hovin nimin khan COVID-19 hri kai enkawl te chungchanga hmalakna hrang hrang thlirho a ni.

SAD Conference Hall-a he thutkhawm ah hian Health Minister chuan COVID-19 hri kai an pun zel avangin ruahmanna kalpui mek leh kalphung neih sa te chu ennawn a, thlirlet a tul thu a sawi a, “A tha ber kan duh avangin ngaihtuahna thar kan sen reng a ngai a, kan boruak tawn zel angin ruahmanna te herrem leh siamthat a tul fo thin a ni,” a ti. Tunhnaia COVID-19 kai tharah naupangte an tam avangin a bika naupangte enkawlna tur, Child Freindly CCC ruahman chu ngaihpawimawh anih thu sawiin, hetiang hi BSUP Durtlang, tuna CCC atana hman mek chu ruahman anih tawh thu a sawi a. Social Welfare Department nen inberawnin ITI Bal Bhawan, tuna Quarantine Centre a hman mek pawh a awm mek te an chhuah hunah Child Friendly CCC a ruahman turin hmalak mek anih thu a sawi bawk.

He thutkhawmah hian Medical Operational Team ten Discharge Protocol leh High Risk Positive Contact inkaihhruaina leh kalphung hman meka inkhunghran hun pawhsei chungchanga rawtna an thehluh chu zau takin sawiho a ni a. Heng te hi ennawn a siamrem hret tha tiin a rang lamin tihfel nise an ti a. Aizawl khawpui chhunga CCC dinhmun te thlirho niin tun dinhmunah inenkawlna hmunhmaah thlaphanna tur la awm lo mahse CCC neih belh zel chu tha an tih thu sawilan a ni bawk.