Health Minister in ZMC-a thawktute theihtawp chhuaha tan la mar zel turin a chah

Health Minister, Dr. R. Lalthangliana chuan ZMC-a thawktute chu theihtawp chhuaha tan la mar zel turin a chah.

Health Minister, Dr. R. Lalthangliana hian nimin khan Zoram Medical College (ZMC), Falkawn-a COVID-19 Swab Sample Test-na Laboratory leh Intensive Care Unit (ICU)-a thawktute chu an hah leh thawhrimzia hriatpui nan ei tur chi hrang hrang- Apple, Balhla, Persimmon, Thingfanghma, leh thingpui hmeh chi hrang hrang a hlan a, Health Minister, Dr. R. Lalthangliana chuan ZMC-a thawktu zawng zawng leh Mizoram hmun hrang hranga Health Care lama thawktu zawng zawngte chu an inpekna leh thawhrimna fakawm a tih thu sawiin, an chungah lawmthu a sawi a. ZMC chu COVID-19 avanga damlo na zual (serious)-te enkawlna hmun bik a nih avangin thawktute chu uluk lehzuala inveng chunga fimkhur taka thawk reng turin a chah a. Chhun zan zawma ICU-a thawk te, chawl lova Laborarory lama thawkte leh ZMC-a thawktu hrang hrangte hi an hah em em a ni tih sawiin, an hahna leh thawhrimna chu an hriatpui thu leh an chhuan thu a sawi bawk a ni.

Health Minister chuan niminpiah lawkah COVID-19 hri vei enkawl mek pakhatin vanduaithlak taka nunna a chan chu pawi a tih thu pawh sawiin, a kalsan tak a chhung leh khatte a tawrhpui thu a sawi a. Amah enkawltu, ZMC a thawkte chu kha thil thleng khan an ngaihtuahna leh rilru tihnual mai lo tura chahin, theihtawp tak meuh an chhuah a ni tih Zoram mipuiten an hriatpui a, an enkawl danah sawisel tur a awm lo a ni, a ti a. Theihtawp chhuaha tan la mar zel turin thawktu zawng zawngte a chah bawk a. Mimal leh Kohhran, Zoram hmun hrang hrang leh Mizoram pawn atanga COVID-19 dona lama thawktu zawng zawng leh damlote tana bang lova tawngtai thin zawng zawngte chungah lawmthu sawiin, Pathian khawngaihna leh venhimna dila, lo tawngtai chhunzawm zel turin a ngen nghal bawk.

Health Minister hian September ni 26, 2020 khan ZMC Laboratory leh ICU-a thawkte tan hian thei leh ei tur chi hrang hrang a lo pe tawh a, June ni 13, 2020 khan ZMC-a thawkte tan hian an thawhrimzia hriatpuiin Vawk a lo talh sak tawh bawk a ni.