Latest News

Hri laka himna tura tanlak a tul e

Nimin khan Serchhip-ah COVID-19 hri kai mi pahnih hmuhchhuah niin heng hri kai hmuhchhuah thar te hi hri an kaina hriat ala ni lo a. Hetianga zinchhuahna nei lemlo leh hri kaina chhan hriatloh kan neih tak avang hian kan khawpui hi kan hri leng buaipui mek hian engtiang chiahin nge min lo chim tawh tih hriat a har ta hle mai a. Hei kai hmuhna VC Area-ah inkharkhip te puan ni mah se khawpui chhung Veng hrang hrangte hi in-kalpawh nasa tak kan la nih bawk si avangin hri hian a thlen chin tur hriat a har ta hle mai a, chutihrual chuan heng hri kai kan hmuh te hriatchhuah an nih hma hian hri hian min lo luhchilh hneh tawh hle em ni tih pawh ngaih-tuah tham tak a ni bawk.

COVID-19 in Mizoram min rawn luh- chilh khan mipuite kan hlauthawng viau a, a hnuah hri kai an tam tial tial a, chenpui dan tur kan mithiam ten min zirtir te zawmin kan him tha viau a, amaherawh chu heng fimkhur dan tur an sawi te erawh kan zawm tha lo ta tial tial a, tunah chuan Bazar vel-a Hmai tuamna hmang lova tei mai mai hmuh tur an tamin hri leng karah sawrkar in inkhaihhruaina a siam zawmlo pawh kan tam tial tial a, kan theihna zawn zelah sawrkar in inkaihhruaina a siam te kan palzam ta emaw tih mai theih a nih chang ta pawh a awm hial a ni.

Hetiang hi kan dinhmun a nih mek tak avang leh kan khawpui pawh a chhan hriat loha hri in min luhchilh tak avang hian mipui te kan theihna zawnah kan fimkhur thar leh a tul ta hle mai a. Hri laka kan him theihna tura kan sawrkar thuneitute min zirtir thin te kha mitin te hian zawmin he hri leng mek hi kan inkaidarh lohna tura theihtawp kan chhuah a tul leh ta hle a ni.

Comments

Popular News (Last 30 Days)