Chanchin thar thenkhat :

Van Dhan Mission sawiho

Mamit District-a Van Dhan Mission kalpui dan tur ngaihtuahin nimin khan District Level Coordination & Monitoring Committee (DL-CM) chu District Bawrhsap, Dr. Lalrozama IAS hovin an thukhawm a. Van Dhan Mission hi ram-ngaw hausakna Minor Forest Produce (MFP) chhawr tangkai thei tura thingtlang lonei mite'n an thil tharchhuah leh ramngaw hausakna hmanga eizawnna ngelghet an lo neih theihna tura Ministry of Tribal Affairs leh Mizoram sawrkar in an kalpui tur niin Mamit District-ah hian Van Dhan Mission hnuaiah hian Van Dhan Vikas Kendras (VDVK) paruk thlan an ni a. Heng VDVK paruk te tanpuina tur hian khawl leina tur leh Farmers training-na tur bakah an hmanrua leina turin TRIFED atangin Implementing Agency, Assistant Registrar Cooperative Societies (ARCS), Mamit kaltlangin pek an ni dawn a ni.

Council of Minister thukhawm

Nimin khan Chief Minister, Zoramthanga hovin Council of Ministers thutkhawm chu Chief Minister’s Conference Hall-ah neih a ni a, he hunah hian Mizoram Telecom Infrastructure Policy, 2020 chu pawm niin Draft Mizoram State Water Policy, 2020 te; World Bank kal-tlanga Mizoram Health Systems Strengthening Project (MHSSP) funding pe tura phalna te; Commerce & Industries atanga lut – OIL India Ltd., ONGC leh M/S Vedanta Ltd. hnena Petroleum Exploration License pek leh Cooperation Department atanga post thenkhat tih danglam leh siamrem bakah Mizoram Horticulture Service Cadre posts leh Directorate of Agriculture restructure te chu pawm a ni.

Sawrkar in hriattirna chhuah

Mizoram Sawrkar chuan Sawrkar Laipui Ministry of Home Affairs hriattirna dungzuiin ramdang mi, an Visa tawp hnua India ram a la cham te chhui leh chhinchhiah turin Task Force for Immigration Check Posts (ICPs) dinna tur hriattirna chu September ni 29 khan a tichhuak.

BSL-3 Lab. din thuai phut

Hachhek bialtu MLA, Lalrindika Ralte chuan nimin khan Aizawl Press Club-ah thuthar thehdarhtute kawmin COVID-19 avanga Mizoram-a Lockdown kalpui a nih atanga thla ruk (6) a liam hnuah pawh Mizoram sawrkarin ama pualin RT-PCR khawl hman theihna tur BSL-3 Laboratory pakhat pawh a din thei lo niin a sawi a. Falkawn-a TB endikna atana din BSL-3 Laboratory chu National TB Elimination Programme (NTEP) hnuaia din a ni tih sawiin, TB vei damlote nena inngheng renga COVID-19 test-na Laboratory dah a ni chu a diklo tih a sawi a, a rang thei ang bera BSL-3 Laboratory dang din thuai turin sawrkar an phut bawk.

Thlaktu dah lova sawn duhlo

MZP Hqrs. Mamit chuan District Hospital Mamit-a Grade-I of MHS under Dental Surgeon Sub-Cadre, Dr. Zonuntluangi a thlaktu awm lova Civil Hospital Aizawl-a sawn a ni chu pawi an tih thu leh mipuite zahlohna ah an ngaih thu an sawi a. Dr. Zonuntluangi hian District Hospital Mamit a chhuahsan hmaa a thlaktu tur dah sak ngei tura sawrkar chu phutin, a dah sak theilo a nih chuan a sawnna tura thupek chhuah tawh chu cancel turin sawrkar chu an ngen bawk. Hei bakah hian Anaesthetist bakah Ortho Doctor, ENT Doctor leh Radiologist te pawh dah turin an ngen bawk.

Lunglei-ah Vaimim lei tan

High Power Committee (HPC) Lunglei chuan niminpiah, Sept. 30, 2020 atang khan Lunglei District chhunga SEDP Vaimim (a fang ro nuai thlak) chu Ar chaw atan a lei tan a, Vaimim hi Kg. ah Rs. 25/- zela lei niin Lunglei District-ah hian Vaimim mal nuai thlak, a ro tha quintal 1500 chuang tharchhuak tura beisei a ni. Kumin hian a vawikhatna atan Lunglei-ah hian Vaimim atangin Ar chaw tur siam tum a ni.