Mizoram State Cancer Institute tan Motor pe

Lawngtlai West bialtu MLA, C. Ngunlianchunga chuan nimin khan Mizoram State Cancer Institute, Zembawk in a tul apianga an hman tur lirthei ( Van motor) chu MLA Fund atangin a pe.

Lirthei hlanna hun nimin-a neih ah Lawngtlai West Bialtu MLA chuan kum 2017 khan Cancer natna in a tlakbuak tawh thu sawiin, phai lamah theihtawpa a in enkawl hnuah Pathian tihdamna a chan thu leh Cancer natna in a tlakbuak te dinhmun a taka tawng tawhtu a nih thu a sawi a. Mizoram chhung hmun hrang hrang leh ram pawn atang pawha Cancer Hospital, Zemabawk pawimawhzia leh Hospital pantu damlo thenkhat khawsak harsa tak tak ten Civil Hospital, Aizawl-ah CT Scan leh MIR tih ngai te tan veivahna lamah harsatna an tawh nasat thin avangin chung damlo te tana hman tur atan chuan an veivahna tur lirthei hi pe a nih thu a sawi a ni.

Lawngtlai West bialtu MLA chuan Hospital tan lirthei (motor) pek chu politics-a thangthat lak tum vang a nih loh thu leh MLA Fund chu mahni bial chhunga hman tur nimahse, Cancer natna tuar mek, tuna Cancer Hospital pantute tan bial bial a awm theihloh thu leh natna tuartu leh thlabara awm te harsatna sutkian a duh vang a ni tih a sawi a. Natna tuara mangang, miharsate tan malsawmna a nih ngei a beisei thu he hunah hian a sawi bawk.