MNF Party MLA ten MLA atanga Lalduhoma ban tura Speaker hnena an thlen chhan an sawifiah

MNF Party-a MLA te chuan nimin khan Aizawl-ah thuthar thehdarhtute kawmin Serchhip bialtu MLA, Lalduhoma chu Dan bawhchhiat leh palzut avanga MLA atanga ban turin Assembly Speaker hnenah thlen a nih thu sawiin, ZPM Tangrual Pawl leh ZPM Party chu thil hrang daih niin an sawi bawk.

Aizawl Mizo Hnam Run-a thuthar thehdarhtute an kawmna hunah hian MNF MLA te atangin Lengteng bialtu MLA, L. Thangmawia chuan Sept. 22, 2020 khan Mizoram Legislative Assembly Speaker, Lalrinliana Sailo hnenah Serchhip A/C atanga thlantlin, Lalduhoma MLA chuan ‘Dan’ a bawhchhiat mai piah lamah a palzut chhunzawm bawrh bawrh avangin ‘Anti-Defection Law’ hmanga MLA atanga bán (disqualify) turin ngenna an thehlut tih sawiin, “Hei hi kan ram kal zel turah dan siamtu ber Legislator-ten dan an zah a, Chief Minister, Minister leh MLA-te pawh ni se, mi tute mah ‘Dan’ chunga lêng an awm lohzia lantirna tur leh, Dan siamtute zinga ‘Dan’ palzût chu mipui zahlohnaa tih hi kan ngaihdan a nih vang a ni,” an ti a. He an thil tih hi ram Danpui humhimna tur leh, chumi hmanga inbeihna (Legal Battle) pangngai, zahawm taka kalpui tura an beisei vang a ni tih sawiin, “Hetihlai hian phuahchawp thil leh politics hri thalo, dâwt leh thudik chanve hmanga politics inchirhthehna satliaha ngaitu an awm ta mai hi pawi kan ti,” an ti.

MNF MLA te chuan Zoram mipuiten ZPM kan hmelhriatna hmasa ber chu August 15, 2017-a pawl pathum - Mizoram People’s Conference, Zoram Nationalist Party leh Zoram Exodus Movement-ten party leh pawl thiah kher ngai lova thawhhona thuthlung an ziak atang khan a ni tih sawiin, Lalduhoma pawh hi Independent-a ding ni mah se Zoram People’s Movement (Tangrual Pawl)-a an thawhhona hnuaia ding a nih avangin he an thawhhona huangchhunga a awm chhung (Party thar din a nih hma zawng) chuan dan a kalhin kan hre lo tih an sawi a. ZPM chu ECI-in July 3, 2019-a Party pakhat anga a pawm tak avangin ZPM Tangrual Pawl leh ZPM Party chu thil hrang daih niin an sawi bawk.

MNF MLA te chuan ZPM chu party a lo nih takah leh MLA an din laia Movement anga an thawhhona huang an pensan hnuah pawh ban (disqualified) hial an ngaih loh nan ZPM Tangrual Pawl MLA-te chu thuneituten an dinhmunte hrilh hriain fimkhur a ngaih thu pawh sawipui an nih thu an sawi a. Amaherawh chu Lalduhoma hian a zawm lemlo tih an sawi a. Lalduhoma chu mimal-a huatna an neihloh thu sawiin, “Dan bawhchhe chung leh palzut chunga Dan siamtu zinga a tel hi Zoram mipuite an zahawm kan ti a, a remlo kan ti mai zawk a ni,” an ti bawk.

Comments

Chhiar Hlawhte