Ruihhlo hmansual vangin Mizoram-ah kumin chhungin mi 53 in nunna an chan tawh

Kumin chhungin Mizoram-ah Damdawi hmansual vanga thi mi 53 an awm tawh a, an zinga tam ber chu Heroin leh thildang tihpawlh niin Hripui leng avanga inkharkhip kalpui chu sawrkar in a thlahdul deuh hnuah Mizoram-a Heroin man pawh a tlawm leh deuh tawh nia thudawn a ni.

Excise & Narcotics Department chhinchhiahna atanga a lan danin kumin chhunga Mizoram-a damdawi hmansual vanga thi mi 53 zinga 49 hi mipa niin midang 4 te hi hmeichhia an ni thung a, damdawi hmansual vanga thi hi January thla-ah mipa 5 leh hmeichhe 2, February thla-ah mipa 5 leh hmeichhe 1, March thla-ah mipa 2, April thla-ah mipa 5, May thla-ah mipa 5, June thla-ah mipa 6, July thla-ah mipa 8, August thla-ah mipa 5 leh hmeichhe 1 leh September thlaah mipa 8 te an ni. Damdawi hmangsualte thihpui tam ber hi Heroin leh thil dang tihpawlh a ni.

Excise & Narcotics chhinchhiah danin kum 1984 atanga October ni 1, 2020 thleng khan damdawi hmansual vang hian Mizoram-ah mi 1,632 an thi tawh a, heng zinga 1,441 hi mipa niin hmeichhia 191 an awm bawk. Chhinchhiahna atanga a lan danin drugs ti thinten an thihpui tam ber chu Proxyvon /Parvon Spas a ni a, hemi avanga thi hi 1,161 an awm tawh a. Heroin vanga thi 213 leh thil dang dang tihpawlh vanga thi 258 an awm bawk.

Excise & Narcotics Department thawktute chuan lockdown thlahdul hnuah Drugs hmuh tur a tam thar leh niin an sawi a. Ruihhlo hi a tlangpuiin khawchhak lam atangin a lo lut nia sawiin, Bagha lam atang chuan a lo lut meuh lo nia an hriat thu an sawi a. Ruihhlo man pawh tlemin a tlahniam nia sawiin, a hmaa hawng khat Rs. 70,000/60,000 vel ni thin chu Rs. 50,000 te pawhin hmuh tur a awm tih an sawi a. Drugs ti thinte pawh nidang ai chuan an zalen thar leh deuh nia an hriat thu an sawi bawk.

Excise & Narcotics Department hian kumin chhungin Rakzu litre 33,898, Zu bilh lai Tin 61,843, Heroin kg 7, Ganja kg 25.9 an man tawh a, ruihhlo kaihnawihah hian lirthei 72 an man tawh bawk.  END hian NDPS Act hnuaiah mi 390, MLP Act hnuaiah mi 826, ME Act hnuaiah mi 27 leh ruihhlo kaih hnawihah ram dang mi 11 an man tawh bawk a. Kumin ah hian hri leng avanga hun rei tak State leh ramdang nena inkalpawhna khar a nih avangin State pawn atanga Zu leh a kaihhnawih man erawh nasa takin a tlahniam thung a ni.