State pahnih Home Secretary ten inbiakna an nei

Tunhnaia Mizoram leh Assam ramri-a buaina thleng chinfel a nih theih nana hmalak dan tur chungchangah nimin khan State pahnih Home Secretary te chuan Lailapur-ah inbiakna an nei.

He inbiakna ah hian thupui pali (4) sawiho niin State pahnih inrina bawr velah chuan inrawn-tawnna leh in remtih puitawnna awm lo chuan engti kawng mah a hmalakna awmlo se an ti a. Assam Home Secretary in Mizoram ramri-a Police dah belh te sawnchhuak leh tur a rawtna a siam chu Mizoram sawrkar-a Home Secretary, Lalbiak-sangi chuan, “Mizote himna tur atan Sawrkar in tul a tih chhung chu ramri-ah Police Duty dah chhunzawm an ni ang,” a ti thung.

Home Secretary, Lalbiaksangi chuan hnamdang lirthei chetvelna dodal zawngin Mizo-ram chhungah engmah hmalakna a awm loh thu he thutkhawm ah hian a sawi a, ramri-a buaina a chhuah avanga Mizoram chhunga hnamdang lirthei khalhtu tangkhangte chu YMA hmalakna in tha tak a enkawl an nih thu a sawi bawk.

He hunah hian Social Media, TV leh chanchinbu kaltlanga thubelhchian dawllo thehdarh a tam thu sawilan a ni a, hemi avanga hmun hrang hranga buaina leh harsatna thlengte pawh tarlan a ni bawk. Ramri a buaina in zialam a pan a, lirthei te pawh thlamuang tak a an tlan theih hunah Police duty sawnchhuah chu ngaihtuah that a nih tur thu sawi a ni bawk.

Assam sawrkar-a Commissioner & Secretary (Home & Border), GD. Tripathi chuan ramri hnaih-a District-te chuan thawhhona tha an neih theih nan Deputy Commissioner ve ve te leh a hnuai lama thuneitute thlengin thutkhawmna tur hunbi mumal tak nei thin tura a duhthu a sawi a. COVID-19 hri venna kawnga ramri a hma-lakna ah te pawh a tul a nih chuan puih an hreh loh thu a sawi bawk a ni.