Chanchin thar thenkhat :

Mau chungchang zirhona nei

Mizoram Science, Technology & Innovation Council (MISTIC) leh Institute of Bio-Resources and Sustainable Development (IBSD) te tangkawp buatsaihin nimin khan Directorate of Science & Technology Conference Hall-ah Mau chungchang Sensitization Programme neih a ni a. He hun hi Horticulture Development Board Vice Chairman, Prof. F.Lalnunmawia MLA leh Bamboo Development Board Vice Chairman, Dr. K. Pachhunga MLA te chuan hmanpuiin Dr. Kumaraswamy Jayaram, Scientist, IBSD chuan Mau atanga biosilia, Mau/rawtuai chhunga phut, ‘Mau dal’ lakchhuah a hman tangkai dan zirtirna hun a hmang a. Zawhna leh chhanna hun hman a nih bakah sawihona hun hman a ni bawk.

P&E Minister in ramri tlawh

Assam leh Mizoram ramri tlawha zin P&E Minister, R. Lalzirliana chuan nimin khan Vai-rengte-a Auto Taxi Stand thlang, Assam hovin an rawn chuhpui lai chu a tlawh a, helai ramri a min tibuaitute chuan buaina an rawn chawkchhuak lui leh a nih chuan chet hlah miahloh tur a nih thu a sawi a, “India sawrkar hian Mizote hi min ensan mai mai dawn lo, raldo ngama kan huaisen zia an hria a ni,” a ti. P&E Minister hian nizan hmasa khan Bairabi-ah khawtlang hruaitute a kawm bawk a, “Ramri-ah vai hovin min tibuai hmasa a. An ngam chen chen chu kan ngam ve a ni,” a ti bawk.

Bank hmalakna thlirho

Nimin khan Lunglei-ah District Consultative Committee/District Level Review Committee/District Level Security Committee thutkhawm neih niin kumin June thla tawp thlenga an District chhunga Bank te hmalak dan an thlirho a. Lunglei District chhunga Bank hrang hrang ten sum an dawn atanga Loan an pekchhuah, CD Ratio chu 46.98% niin National Benchmark 60% phak tur chu a phaklo a, Pradhan Mantri Awas Yojana hnuaia Housing Loan pekchhuah thu ah Bank thenkhat chu tan la tura tih an ni bawk.

Aizawl Manifesto thlirho

PC Party chuan nimin khan Aizawl-a an Office-ah Aizawl Municipal Corporation (AMC) inthlan lo awm tura 'Aizawl Manifesto' thlirhona an nei a, 'Better Aizawl' siam a Aizawl dinhmun tha zawka hlan chu an thil tum a nih thu leh 'Green Aizawl' siam a thingkung zuah leh phun belh uar an tum thu sawiin, Slum Area awm zawng zawng tihbo an tum thu te pawh an sawilang bawk.

MDC 4 MNF-ah lawmlut

Lai Autonomous District Council (LA-DC)-a MDC pali chu nimin khan MNF Vice President, Lalthlengliana chuan MNF-ah a lawmlut a, heng MDC lawmluh tak te hi CEM pawh lo ni tawh V. Zirsanga leh VL. Hmuaka te bakah Lallawmsanga Apetow leh ST. Laldailova te niin LADC-a MDC 25-ah MNF in MDC 12 a nei ta a ni.