Chief Minister in Mizoram hmun hrang hranga Intermediate Storage Godown thar 9 a hawng

Food, Civil Supplies and Consumer Affairs Department hnuaia Mizoram hmun hrang hranga Ration buhfai dah lailawkna tur Kudam, Intermediate Storage Godown sak zawh te chu nimin khan Chief Minister, Zoramthanga chuan a hawng.

Heng Intermediate Storage Godown hawnna puala inkhawm Mizoram Assembly Annexe Conference Hall-a neih ah Chief Minister, Zoramthanga chuan FCS&CA Department in Mizoram-in kan mamawh em em buhfai tha taka dah theihna tura Kudam an siam chu lawmawm a tih thu a sawi a. Mihirng tan chaw ei tur tlakchham a hlauhawm avanga sawrkar pawhin ei tur neilo an awm loh nana hmalak chu a ngaihpawimawh thu sawiin, COVID avangin harsatna hrang hrang karah leh pawisa lama harsatna awm zingah pawh ei tur supply lamah chuan neih ang hman zel a ruahmanna siam zel a nih thu a sawi bawk.

He hunah hian Khual Zahawm Supply Minister, K. Lalrinliana pawhin Chief Minister hmalakna in India sawrkarin CSS 2017-2020 hnuaiah Mizoram chhung hmun sawm (10) ah Intermediate Storage Godown sakna turin Grant-in-Aid atangin cheng vbc. 19.22 chu February, 2019-ah a hmuh tak hmanga heng Kudam hawn takte hi sak a nih thu a sawi a. Kolasib, Darlawn, Khuangleng, Darlung, Reiek, Khawlailung, Lawngtlai PDC, North Hlimen, Chawngte leh Maubawk-ah Kudam hi sak a ni tih a sawi a. Heng zingah hian Lawngtlai PDC chu a sakna tur hmunah harsatna a awm avangin sak hna tan lawk theih a nih loh avanga hawn ve theih ala nih loh thu leh tunah hian hna thawh tura zaa 30 vel chu thawh zawh a nih tawh thu a sawi a. Tuna Kudam 10 sak bakah hian NABARD atangin a dang 21 sakna tur dawn a nih thu leh hmalak mek a nih thu a sawi a. Chung bakah chuan Kudam 37 sak a nih theih nan proposal siamin ruahman mek a nih thu a sawi bawk.

Hetianga Kudam thar 10 sak belh a nih avang hian Mizoram chuan buhfai Metric Ton 4450 dah theihna a neih belh phah dawn a. Kudam bakah hian infrastructure kaihhnawih – Courtyard, Approach Road, Toilet Block leh Staff Quarters te sak tel a ni bawk.