Serchhip-ah COVID-19 hri kai thar 11 awmin hri kai mi 4 enkawl dam an ni thung

Niminpiah-a Serchhip-a Sample enfiah atangin COVID-19 hri kai mi 11 hmuh belh leh niin an vai hian State pawn atanga rawn lut BSF Sipai te vek an ni.

Serchhip CMO Office atanga thu kan dawn danin niminpiah khan Serchhip-ah Rapid Antigen Test hmangin Sample 14 enfiah niin heng atang hian hri kai mi 10 hmuhchhuah an ni a, heng hri kai te hi TKS Quarantine Centre-a awmlai vek niin BSF Sipai vek an ni a, State pawn atanga tun thla ni 10-a rawn lut an ni. Heng mite hi kum 26 leh 44 inkar niin Uttar Pradesh, Andhra Pradesh, Odisha, Karnataka, Maharashtra, Rajasthan leh West Bengal atanga lo kal an ni a, Serchhip an rawn thlen hnuah tun thla ni 15 khan Rapid Antigen Test hmanga an Sample enfiah niin hri lakah an fihlim a, amaherawh chu an awmpui zingah hri kai an awm avangin khunghran zui leh niin enfiah an nih apiangin an zingah hri kai hmuh belh zel a ni a, a tira rawn lut mi 25 zingah mi 3 te chauh lo chuan hri hi an kai vek tawh a, heng mi 3 te pawh hi khunghran mek an la ni bawk.

Niminpiah vek khan Serchhip District Hospital TrueNat Laboratory-ah Sample Sample 17 enfiah niin heng atang hian hri kai pakhat hmuhchhuah a ni bawk a, ani hi BSF Sipai bawk niin tun thla ni 20-a Assam atanga rawn lut niin Marian H/S Quarantine Centre-a awm a ni.

Serchhip-a COVID-19 hri kai thahnem tak hmuhchhuah an nih lai hian nimin khan hri kai enkawl mi 4 te chu enkawl dam an nih hnuah anmahni enkawlna hmun atanga chhuahtir an ni ve leh thung a, nimin-a Serchhip-a hri kai enkawl dam tak te hi Serchhip District chhunga Company hnuaia thawk tura rawn lut, Thenzawl leh Chhingchhip-a inkhunghran hnua hri kai tih hmuhchhuah te niin Chhiahtlang Tourist Lodge CCC atangin chhuahtir an ni a, an vai hian mipa vek niin niminpiah lama an Smaple enfiah a nih hnuah hri lakah an fihlim avangin anmahni enkawlna hmun atang hian chhuahtir an ni. Heti hian nimin thleng khan Serchhip District-a COVID-19 hri kai hmuhchhuah chu mi 59 an tling ta a, an zinga mi 20 te chu enkawl dam ni tawhin midang 39 te chu enkawl mek an la ni thung a. Heng mite bakah Serchhip District pawnlam-a hri kai hmuhchhuah enkawl tura an rawn dah te nen Serchhip District-a hri kai enkawl mek chu 69 an la ni a, an zinga mi 63 te chu BSF Sipai niin Nursing School CCC-a enkawl an ni a, midang 3 te chu Chhiahtlang CCC-ah enkawl te an ni thung. Tun dinhmunah Serchhip District-ah hian hri leng avanga inkhunghrang mi 178 la awm mekin heng zinga mi 24 te chu mahni In lama inkhunghrang niin midang 154 te chu sawrkar hmunhma a inkhunghrang an ni bawk.

Comments

Chhiar Hlawhte