AH&Vety Minister in tlawh

AH&Vety Minister, Dr. K. Beichhua chuan nimin khan Aizawl Khatla-a Veterinary Polyclinic Hospital tlawhin hnathawktute hnathawh dan a enpui.

Polytechnic Hospital Seminar Hall-a Department Officer te nen an inkawmnaah Dr. K. Beichhua chuan COVID-19 hri leng karah Department Official te hnathawh dan leh hmalakna te chu chhuanawm a tih thu sawiin, an thahnem-ngaihna leh thawhhona tha an neihte chu lawmawm a tih thu a sawi a. Sa, bawnghnute leh Artui-a Mizoram intodelh theih nan Official te chu tha thar nen, ngaihtuahna thar nen theihtawp chhuah chhunzawm zel turin a chah a. COVID-19 hri leng karah sa ei chi lama Mizoram intodelh lo tih a chiang hle tih sawiin, hei vang hian Mizo-ram mipuiten tun hma aia chak zawka tan kan lak a pawimawh a ni, a ti a, mite kuta innghat lovin keimahni ngeiin kan thawhchhuah a ngai a ni, a ti bawk.

Dr. K. Beichhua chuan kum khat leh thla 10 vel an kal hnua AH&Vety Department hna-thawh tawhte tarlangin, Veterinary Dispensary paruk (6) Mamit, Serchhip, Lawngtlai, Saitual, Khawzawl leh Hnahthial te chu Veterinary Hospital-a hlankai (upgrade) tawh a nih thu leh, Rural Animal Health Centre (RAH) 35 chu Dispensary a hlankai tawh tih a sawi a. District pasarih (7), Lunglei, Siaha, Lawngtlai, Cham-phai, Kolasib, Serchhip leh Mamit-ah te Veterinary Hospital building sak hna thawh mek a ni tih pawh sawiin, heng Hospital te hi khawl tha taka thuam vek an tum thu leh reilote ah peihfel a beisei thu a sawi bawk.

Heng bakah hian AH&Vety Minister chuan Vawk chi sawngbawlna hmun leh a kah-raina hmun, Satellite Boar Semen Station te chu Focus Area, Champhai, Kolasib, Serchhip leh Mamit-ah te a sak hna chak taka kalpui mek a ni tih a tarlang bawk.