Mizoram-ah hri kai 31 hmuhchhuah belh leh an ni

Mizoram-ah niminpiah khan COVID-19 hri kai mi 31 zet hmuh-chhuah leh an ni a, heng zingah hian zirlai Hostel-a lut tur mi 8 zet an tel a ni.

Niminpiah khan ZMC Laboratory-ah Sample 562 enfiah leh niin heng atang hian COVID-19 hri kai mi 7 hmuh belh an ni a, heng hri kai hmuhchhuah te hi Chaltlang mi 5 leh Tuikual South leh Zarkawt atangin mi pakhat ve v an ni a, an zinga pakhat tihloh hi chu hri kai tawh te nen inkawmhnaih atanga hri kaichhawng niin hri kai pakhat hi a kaina tur chhui mek a ni bawk.

Niminpiah vek khan District hrang hranga TrueNat Laboratory-ah Sample 207 zet enfiah niin heng atang hian COVID-19 hri kai mi 3 hmuhchhuah an ni a, Serchhip Chanmari Veng atangin hri kai hmeichhia pakhat hmuhchhuah niin tunhnaia hri kai hmuhchhuah tawh te nen In khat-a cheng an ni a. Lunglei Venglai-ah hri kai pahnih hmuhchhuah niin tunhnaia Serchhip-a hri kai hmuhchhuah tawh, hri an kai tih hriatchhuah hmaa Lunglei-a zin te thlenna an ni thung.

Rapid Antigen Test hmangin niminpiah khan sample 991 enfiah niin hri kai 21 zet hmuh an ni leh bawk a, an vai hian Aizawl District mi vek niin Ebenezer School Hostel, Zemabawk-a Hostel Warden leh zirlai naupang 8 te chuan hri an kai tih hmuhchhuah an ni a, an vai hian Symptom nei vek niin Hostel atanga hri inkaichhawng nia rin an ni. Anni bakah hian Aizawl Chanmari atangin mi 3, Zemabawk leh Durtlang Leitan atangin mi 2 ve ve leh Zemabawk Vengthar, Dawrpui, Armed Veng, Ramhlun Venglai leh Laipuitlang atangin hri kai pakhat theuh hmuhchhuah an ni bawk a, an vai hian Symptoms nei vek an ni.

Mizoram-a COVID-19 hri kai hmuhchhuah chu mi 2341 an tling ta a, an zinga mi 2175 te chu enkawl dam ni tawhin tunah hian hri kai enkawllai 166 an la awm mek a ni.

India-ah hri kai enkawllai 9.29 chiah ni tawh :

India rama COVID-19 hri kai enkawllai chu hri kai hmuhchhuah atangin zaa 9.29 chiah an ni tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah COVID-19 hri kai enkawl dam mi 79,415 an awm leh a, heng te nen hian tun thlengin India ramah COVID-19 hri kai enkawl dam chu mi 68,74,518 an tling tawh a, hei hi India ramah hri kai hmuhchhuah tawh zawng zawng 77,06,946 atangin zaa 89.20 a ni.

Tunah hian India ramah hri kai enkawllai 7,15,812 an la awm mek a, hei hi hri kai hmuhchhuah atangin zaa 9.29 an ni a. India ramah hian COVID-19 hri kai zingah nunna chan 1,16,616 an awm tawh bawkin hei hi hri kai hmuhchhuah atangin zaa 1.51 a ni bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn