Chanchin thar thenkhat :

Lok Sabha MP in thlen

Mizoram Lok Sabha MP, C. Lalrosanga chuan leilung hausakna dap ngawrh turin Parliamentary Committee chu a ngen. Parliamentary Committee on Coal and Steel ruat thar thut-khawmna hmasa ber chu nimin khan Delhi-ah neih a ni a, he thutkhawm ah hian Mizoram Lok Sabha MP, C. Lalrosanga pawh member a nih anga telin India hmarchhak bial-a leilung hausakna dap ngawrh a tul thu a sawi a. Hmarchhak bial, tlangram State-ah te Ministry of Mines hmalakna a la tlem hle tih sawiin, ngawrh zawka leilung hausakna dapchhuahna tur hma la turin Parliamentary Committee chu a ngen a ni. He Committee Chairman, Rakesh Singh-a chuan hmarchhak bial-a leilung hausakna dapchhuauk tura hmalak dan turte sawihona hun tam zawk siam a nih tur thu sawiin, Ministry of Coal leh Ministry of Steel bakah Ministry of Mines hmalak dan turte sawiho leh zirchian a ni ang, a ti bawk.


Hnahthial dinhmun thlirho

Hnahthial District Task Force on COVID-19 chu nimin khan an District Bawrhsap hova thukhawmin hri leng mek chungchanga an District dinhmun an thlirho a. Hnahthial District-ah hian Swab Sample 489 endik ni tawhin heng te hi RT-PCR (ZMC)-ah 248, TrueNat laboratory-ah 155 leh Rapid Antigen Test-ah mi 86 te an ni a, an District-ah hian COVID-19 hri kai mi 5 hmuhchhuah ni tawhin an vai hian an enkawl dam vek tawh a, hri kai enkawl dam hnuhnung ber chu Sept. 26 khan enkawl dam a ni.


Online Workshop nei tan

Information & Public Relations Department leh Mizoram Art Development Society (MADS) tangkawp in an buatsaih ni 5 chhung awh tur ‘Online Art Workshop’ chu nimin khan I&PR Director, Lallianpuii chuan a Office atangin a hawng a, he Workshop-ah hian lemziak thiam mi 57 telin Aizawl bakah Bilkhawthlir, Ruan-tlang, Khumtung, Lunglei leh Kolkata atanga tel an ni.


BJP in dem thu an sawi

BJP Mizoram Pradesh chuan Oct. 9, 2020 a Thinghlun khua a John Zolawma Thlam, Assam Police ten an hal chhiatsak leh a huan thlai engemaw zat tih chhiatsak a ni chu an dem thu nimin khan thuchhuah siamin an tarlang a. He chhiatna avanga sum hloh zawng zawng phu tawk ang pe let turin Assam sawrkar chu an phut bawk. BJP chuan Assam Sawrkar in heti taka min zuam leh an duh hun hun a Mizoram chhunga lo lut a, kan mi te Thlam leh huan an suasam thin chu an duhlo tih pawh sawiin, Pathian leh mipui zarah sawrkarna an chang a nih chuan kan ram venghim tur leh mipui thlavang hauh turin an tlanchhe dawnlo tih an sawi bawk.


Lakhuihthei thar hnem

Sialhawk-a Lakhuihthei chingtuten kumin July thla atanga an lakhuihthei tharchhuah an hralh atangin cheng nuai 56 an hmuchhuak tawh.  Kumin July thla atang khan Sialhawk-a Lakhuihthei chingtute chuan Lakhuihthei Qtls. 5,600 chuang an tharchhuak tawh a. Lakhuihthei thawnchhuah tur lo buaipuitu (Agent) te hlawh leh Sialhawk khawchhunga motor neituten Lakhuihthei an phurhna atanga an hlawhchhuah te nen avaia chhutin kuminah cheng nuai 80 vel an hmu tawh tih an sawi a ni. Sialhawk-ah hian chhungkaw 120 velin Lakhuihthei hi an ching a ni.


FEMSE in CM Relief Fund pe

Federation of Samagra Employee (FEM-SE) in Chief Minister’ Relief Fund-a an chhunluh tur cheng nuai 2 chu nimin khan School Education Minister, Lalchhandama Ralte kutah an hlan. School Education Minister chuan ram in chhiatna nasa tak a tawrh lai leh sawrkar ang pawh a harsatna a tawh laiin FEMSE hruaitu ten CM Relief Fund an pe thei chu ropui a tih thu a sawi bawk.

FEMSE (SSA leh RMSA hnuaia thawk thinte) hian an sum thawhkhawm atangin April thla khan CM Relief  Fund-ah  Rs. 8,40,000/- an lo chhunglut tawh a, hemi hnu hian Khawzawl leh Hnahthial District Hospital-ah Generator 5KVA ve ve pein Saitual  District Hospital-ah bungrua cheng nuai 2 hu an pe bawk a. ICU khum Panga (5) Rs. 2,53,700/- man bakah Refrigerator chu Health Minister kaltlangin ZMC-a hman turin an pe leh tawh bawk a ni.

Comments

Chhiar Hlawhte