Rampum-ah hmelma kut-a thi Police te hriatrengna leh zahna hlanna hun hman a ni

India rama Police an Duty laia hmelma te kut-a nunna chan te hriatrengna leh zahna lantirna hun, ‘Police Commemoration Day’ chu nimin khan rampum ah hman niin Serchhip-ah pawh SP Office tual-ah he Ni hi urhsun taka hman a ni a. Kum 1972 hnuah Mizoram-ah hmelma kut-a thi Police mi 56 an awm tawh a ni.

Serchhip SP Office tual-a ‘Police Commemoration Day’ puala hun hman ah hian Serchhip Addl. SP, PC. Laltanpuia chuan Oct. 21, 1959-a India Police ten Ladakh hmuna China sipai an lambunna hmuna Police huaisen tak tak mi 10 laiin nunna hlu tak an chan phah avanga he ni hi ram tana nun petute hriatrengna, ‘Commemoration Day’ atan India sawrkar chuan a puan thu sawiin, kumtin uar taka hman thin a nih thu a sawi a. India ram State hrang hrangah nikum September 1 atanga kumin August 31 chhungin Police mi 265 lai an Duty laia thi an awm thu sawiin, vanneihthlak takin Mizoram Police zingah hemi hun chhunga duty laia thi an awm loh thu a sawi bawk.

Addl. SP chuan Police te chu midang himna atana thawktu an nih avangin dinhmun him lo taka an din chang a awm thin thu sawiin, hripui leng karah pawh rinawm taka an hna an thawh a tul thin thu a sawi a. “Hun harsa tak pawh tawk thin mah ila, mahni hnaah rinawm taka thawk tur kan ni,” tiin he huna Police kalkhawm te a chah a ni.

Serchhip-a ‘Police Commemoration Day’ ah hian ram tana nun hlantute sunna leh anmahni hriatrengna leh zahna lantir nan 3rd Bn. MAP te chuan Shok Parade an nei a, an Duty laia nunna chan Police te sunna atan ngawi reng-a dingin hun hman a ni bawk.

Serchhip SP Office tuala hun an hman zawh hnu hian Serchhip khaw tlangval, Nov. 29, 2007-a ram tana nun hlantu C/122 Biakro-tluanga, 2nd Bn. IR, Chhatisgarh-a Naxalite hel pawl te chilpuah bomb kam avanga thi ta chhungte an tawrhpuina lantirnan pangpar leh thilpek an hlan a, School a lo kal tawhna thinah amah hriat-rengna atana a thlalak an tar bawk a ni.

British hunlai atang tawhin India Police te hian Tibet leh India inrinna lai bawr mel 2500 zet an veng thin a, October ni 21, 1959 khan Karam Singh, DCIO leh a hote Police mi 20 rual chu ramri bulah China sipai ten lo lambun in Automatic Rifle leh Grenade hmangin an lo bei a. A hmunah mi 10 thiin mi 7 chu hliam na tak tuarin China sipaite chuan an man a. Heng ram tana nunna chante ruang hi China sipai chuan 13th Nov. 1959-ah India kutah hlanin Martarte ruang chu Ladakh hmun a Hot springs-ah chawimawina famkim nen halral an ni ta a. Kum 1960 atang chuan 21st October chu 'Police Commemoration Day' atana ruat niin kumtin Police ram tana nunna hlante hriatrengna, sunna leh chawi-mawina hun atan an hmang ta thin a ni.

Kum 1972 atanga tun thlengin Mizo-ram-ah hian ram tana nunna hlan Police mi 56 an awm tawh a, vanneihthlak takin kum 2 kalta chhung khan Mizoram Police zingah hmelma kut-a nunna chan an awm tawhlo a ni.

India ramah chuan kum 1947 atanga kum 2018 August thlengin Police mi leh sa Duty laia hmelma kuta thi mi 34837 zet an awm tawh a, kum 2019-ah mi 292 awmin kumin hian mi 265 an awm leh a ni.