Lalduhoma hekna-a thutlukna puan hun tur leh hrelo

MNF Party MLA 12-ten ZPM Legislature Party (ZLP) Leader Lalduhoma dan bawhchhiaa puha MLA atanga bân tura Assembly Speaker, Lalrinliana Sailo an ngen chungchangah thutlukna puan hun tur sawi theih a la ni lo a, hemi chungchangah hian Speaker Lalrinliana Sailo chuan theihtawp a dan en a nih tur thu a sawi.

Zalen in hemi chungchang a zawhna a channa ah Assembly Speaker, Lalrinliana Sailo chuan an hriat theih ang tawk Dan en chungin fimkhur takin hma an lak thu leh an hmanhmawh loh thu a sawi a. “Duhsak bik awm lovin hma kan la a, Pu Duhoma rawn insawifiahna chu complaint-tu MNF lamah kan pe a, an rawn chhanna pawh Pu Duhoma kan pe ve leh ang,” tiin, “Thuhruk awm lovin kan hrilh tawn vek a, hei hi an rawn sawi dan che a ni kan ti tawn tawn mai,” Speaker chuan a ti bawk.

Lalrinliana Sailo chuan Lalduhoma hek a nih chungchang a thutlukna awm theih hun tur chu a la sawi theih loh tih pawh sawiin, bân a nihna tur chance a san zawk leh san zawk loh tur pawh sawi theih a la awm loh thu a sawi a. “Theihtawpin dan kan en ang chu,” a ti bawk.

Speaker hnena hek a nih chungchangah ZLP Leader leh Serchhip bialtu MLA ni bawk, Lalduhoma chuan thutlukna siam turah rin dan sa engmah a neih loh thu a sawi ve bawk a, Speaker thutlukna siam tur a nih thu leh Speaker thu thu a ni tih a sawi a. ZPM thlantlin an nih thu leh amah phei chu ZPM Chief Ministerial Candidate lai a nih thu sawi bawkin, “Ani hi a ZPM em mai in tiha inbân tum hi a mak ve bawk em a ni,” a ti a, “Nangmah thlangtlingtu che hi phatsan rawh min ti nge ni zawk ni, MNF lam hian dan min bawhchiattir an tum zawk ka hre lo,” a ti bawk.

Tarlan tawh thin angin MNF Party-a MLA thenkhat te chuan Sept. 22, 2020 khan Speaker hnenah lehkha thehlutin Lalduhoma hi Dan bawhchhia-ah puhin MLA atanga ban tur hian an lo ngen tawh a ni.