Latest News

Serchhip District-ah 70.49 enkawl dam tawh

Serchhip District-a COVID-19 hri kai hmuhchhuah zinga za zela 70.49 te chu enkawl dam ni tawhin tunah hian Serchhip District-a hri kai zingah enkawllai mi 18 an la awm.

Serchhip CMO Office atanga thu kan dawn danin Serchhip District-ah hian niminpiah khan hri kai hmuh thar awm lovin nimin thleng khan hri kai hmuhchhuah zawng zawng chu mi 61 an tling tawh a, nimin khan hri kai zinga Nursing School CCC-a enkawl BSF mi 8 leh Chhiahtlang Tourist Lodge CCC-a enkawl, Company hnuaia thawk mi pakhat te chu enkawl dama chhuahtir niin heng te nen hian nimin thlenga Serchhip District-a hri kai hmuhchhuah zinga enkawl dam chu mi 43 an tling tawh a, hei hi hri kai hmuhchhuah atanga chhutin za zela 70.49 niin tunah hian midang 18 te chu enkawl mek an la ni.

Serchhip District-ah hian BSF Sipai zinga hri kai enkawlna hmun a awm avang leh tunhma deuh ah Thenzawl lamah hri kai enkawl tur rawn dah an awm thin avangin Serchhip District-a hri kai enkawl mek erawh an la tam viau thung a, nimin thleng khan Serchhip District ah hri kai enkawllai mi 64 awmin an zinga mi 60 te chu BSF Sipai niin Nursing School CCC-ah enkawl an ni a, midang 4 te chu Chhiahtlang Tourist Lodge CCC-a awm an ni thung.

Serchhip District-ah hian hri leng avanga inkhunghrang mi 192 an la awm mek thung a, heng zinga mi 185 te chu sawrkar hmunhma hrang hrang 10-a inkhunghrang te niin midang 7 te chu mahni In lama inkhunghrang an ni thung.

Comments

Popular News (Last 30 Days)