HSSLC leh HSLC result chhuaka sawrkar School tithate lawmpuina hun Minister hova hman a ni

Kum 2020 HSLC leh HSSLC result chhuaka zirlai za-a za pass tir thei Mizoram hmun hrang hranga sawrkar enkawl School 21 te lawmpuina hun chu nimin khan buatsaih niin Serchhip atangin zirna In pahnh ten lawmpuina hi an dawng a ni.

School Education Directorate Conference Hall-a heng zirna In titha te lawmpuina hun hi School Education Minister, Lalchhandama Ralte chuan hmanpuiin kumdang-a la tih ngai loh School result nei thate chawimawina hun buatsaih a ni chu lawmawm a tih thu a sawi a, hei hian kumdang zelah pawh inelna thianghlim a siam a beisei thu a sawi a. HSLC leh HSSLC result a zirlai za-a za pass tir thei School te chu an hlawhtlinna chhawm nung zel tur leh engtinnge hma an sawn zel ang tih ngaihtuah turin a chah bawk.

Zirtirtu indaihlohna nasa tak karah hripui leng vangin post ruak engemawzat hnawhkhah tura hmalak mek te a sukuk ta rih tih pawh sawiin School Education Minister chuan, hei vang hian thawktu awm ang ang te chu theihtawp chhuaha tan lak lehzual a tul thu a sawi a. Thawktute hamthatna ngaihtuahin hmasawn zel dan tur kawng sawrkarin a dap mek tih a sawi a. School Education Department chu Mizoram Sawrkar-a Department lian ber an nih angin inrelbawlna tha zawk nei turin hmalak mek a ni tih a sawi bawk. Education Minister chuan sawrkar enkawl School, hmanrua leh bungrua nei tha zawk, zirtirtu thiam leh tha rualin an enkawl School ten Private School an tluklo fo mai chu pawi a tih thu sawiin, kum lo la kal zel turah tan la thar turin zirtirtute chu a fuih bawk.

Nimin-a School titha lawmpuina dawngtute hi - Govt. JM High School, Serchhip District; Eklavya Model Higher Secondary School, Serchhip District; Govt. Rawpuichhip High School, Mamit District; Pukzing RMSA Secondary School, Mamit District; Lalhnuni High School, Tuipui D, Lunglei District; Rotlang ‘E’ RMSA Secondary School, Lunglei District; Govt. Mizo H/S Khawhai, Champhai District; Thangkunga Memorial H/S, Tlangpui, Champhai District; Govt. Sialhawk High School, Champhai District; Govt. Bungzung High School, Champhai District; Pawlrang High School, Champhai District; Khawhri High School, Hnahthial District; Govt. Hnahthial High School; Govt. Southern High School, Hnahthial District; Govt. Bethel High School, Pang khua, Lawngtlai District; Lungzarhtum RMSA Secondary School, Lawngtlai District; Theiri RMSA Secondary School, Siaha District; Govt. Hrangchhunga High School, Aizawl District; Muthi High School, Aizawl District; Govt. Awithangpa High School, Thiak, Aizawl District leh Govt. Mizo Higher Secondary School, Aizawl District te an ni.

Comments

Chhiar Hlawhte