Kum Upa mi 19 te hnenah chawimawina hlan

Vawiin Oct. 1, 2020 hi khawvel puma Upa te ni, International Day of Older Persons a ni a, he ni pual hian nimin khan Social Welfare Minister, Dr. K. Beichhua chuana Pisa-ah kum upa te chawimawina hun a buatsaih.

He hunah hian Dr. K. Beichhua chuan Mizoram pumah kum za (100) tling MUP in an zawnchhuah mi 19 lai an awm chu lawmawm leh ropui a tih thu sawiin, hetianga chawimawina hun hi anmahni ngei sawmin buatsaih a chakawm rualin, kan hun tawn mek in a zirloh avangin mi tlem te hovin he programme hi hman a nih thu leh MUP kutah chawimawina te hi hlan a nih thu a sawi a. Sawrkar leh Department in a theih ang angin upa te chu a ngaih-pawimawh thu leh, Hnam ang pawhin thangthar ten Upa te hlutna hriain ngaihsak nachang an hre chho zel chu thil lawmawm a nih thu a sawi bawk.

He hunah hian Dr. K. Beichhua chuan Aizawl leh Lunglei-ah te Upate awmna tur, Old Age Home sak tan nan Concept Note te siamin hmalak mek anih thu a sawi bawk.

Nimin a he hun hmanna ah hian Mizoram a kum 100 tling mi 19 te hnenah chawimawina hi hlan niin an aiawhin MUP General Hqrs. leh MUP Lunglei hruaitute hnenah chawimawina thu-ziak leh Rs. 1000/- zel hlan a ni a. Chawimawina hlan zingah hian kum 105 mi- Aiziki, Chanmari Lunglei leh Kapchhawna, Mualcheng South te telin Serchhip District atangin chawimawina dawng phak an awmlo thung nia thudawn a ni.